EDITORIAL: Kaanonto a maisubli ti dignidad kadakuada?

Nasurok pitopulo a tawen manipud idi naggibus ti Maikadua a Gubat iti Sangalubongan, saan pay laeng a naited ti hustisia kadagiti babbai (babbaketda itan) iti nadumaduma a paset iti Asia nga intalaw wenno tiniliw lattan dagiti opisial ti Japanese Imperial Army tapno agpaayda a pagpalpaliwaan dagiti soldado.
Naaw-awaganda iti comfort women, nagbalin dagitoy Asian women, karaman ditoy dagiti kailiantayo a Pilipina, a sex slaves dagiti tropa dagiti soldado a Hapones idi World War II.

Iti sumagmamano a tawen agingga idi naggibus ti gubat, agarup 200,000 a babbai ti napilit a nagpaay a pagpalpaliwaan dagiti soldado a Hapones kadagiti pagkampuan ken headquarters.

Idi naggibus ti gubat, napasubli dagitoy iti naggapuanda a pagilian. Ngem kaadduanna kadakuada ti naggulimek lattan gapu ta sineknan ida iti nakaro unay a bain gapu iti sinagrapda iti ima dagiti soldado a Hapones.

Idi 1991, sumagmamano kadagitoy a comfort women ti limtaw manipud iti nagkulmeganda, nasursuroda nga imbando iti sangalubongan ti kinadamsak a sinagrapda kas comfort women iti ima dagiti soldado a Hapon.

Sumagmamano kadakuada ti nagtimek iti sanguanan ti forum ken simposium iti nadumaduma a paset ti lubong tapno maiwaragawagda kadagiti nasion ti napasamak kadakuada, tapno maited kadakuada ti hustisia ken dignidad.

Ania ti napasamak? Nagpadispensar ti Japan gapu iti daytoy a sinagrap dagiti comfort women.

Ngem saan a maawat dagiti biktima nga agpatingga laeng iti panagpadispensar ti Japan.
Ad-adda ketdi a nakariknada iti insulto idi imbaga ni Prime Minister Shinzo Abe nga awan ti opisial nga inannong ti Japan wenno ti Japanes Imperial Army iti pannakaporsar kadagitoy a biktima nga agpaay a pagpalpaliwaan dagiti soldado a Hapon idi WWII.

Ita, dandanin agtabon ti init dagitoy a comfort women. Ngem agingga ita, kasla nakadamdamsak a bangungot nga agsublisubli kadakuada dayta paset iti panagbiagda, dagiti rabii iti panipngeten ken nailet a kuarto bayat ti panagdakiwas dagiti nakersang a dakulap iti nakaduyayat a bagida idinto a kasla punial a maiwekwek iti kaungganda dagiti gartem ken kinaderrep a nangisualit iti dignidadda a kas babai.

Kaanonto ti pannakagun-odda iti hustisia?

Agtultuloy la kadin a main-inutda a maiwalin iti dalan iti sanguanan ti makatitileng a kinaulimek ti di mannakirikna a lubong?#