EDITORIAL: Kabaelan ngata ni Pacquiao ni Mayweather?

Kalpasan ti naunday a panawen, agbalin met laengen a realidad ti panagrupak da Manny Pacquiao ken Floyd Mayweather, Jr. iti ring a maangay iti MGM Grand, Las Vegas, Nevada inton Mayo 2 daytoy a tawen.

Iti daytoy a panagboksingda iti ring, maammuan met laengen dagiti apisionado iti boksing no asino kadakuada a dua ti kalaingan ken kasiglatan a boksingero iti daytoy a henerasionda.

Makapakatay ti kadakkel ti naitanggaya a kuarta kadagiti dua a malalaki a boksingero tapno laeng matungpal ti nabayagen nga iyir-iriag dagiti boxing fans a panagsangoda tapno maammuanen no asino kadakuada ti best pound for pound a boksingero.

Iti daytoy a panagrupakda iti ring, immabot iti $250 million ti kadagupan a purse para kada Mayweather ken ni Pacquiao babaen ti 60-40 nga iskema wenno 60% ti akupen ni Mayweather idinto a 40% ti mapan ken ni Pacquiao.

Daytoy ti maysa kadagiti karigatan nga inurnos dagiti promoter tapno mapagwenda ti saan pay a naabak, ken kampeon iti lima a dibision a ni Mayweather a makirinnangas iti ring ken ni Pacquiao, ti idolo dagiti Pilipino a nangiggem iti walo a dibision kas kampeon. Ngem iti pannakapirma iti katulagan iti panagrupak iti ring, sigurado a daytoy ti kadakkelan ti pastreken iti historia ti boksing iti sangalubongan. Manamnama a makapastrek daytoy a panagboksing ti dua a malalaki a boksingero iti nasurok a $300 million ken makailako iti nagbaetan iti 2.5 million agingga iti 3 million pay-per-view iti Estados Unidos laeng.

Adda pamkuatan dagiti managayat iti boksing nga agrag-o iti pannakabuyada met laeng iti panagrinnangas da Mayweather ken Pacquiao iti ring ta iti naunday a panawen, iti sanguanan dagiti napnuan balligi a panagpayagpag dagiti dua, naipalpalagiden a panawenen ti panagsangoda tapno madesisionan ti husto a pound for pound king.

Ngem adu unay ti dinakdakamat ni Mayweather a masapul a masurot sakbay a makisango ken ni Pacquiao kas iti panagpaeksamen ni Pacquiao iti droga, blood and urine testing, ken bingayna iti purse. Impetpetteng ni Mayweather a saan nga umannugot iti 50-50 sharing no di ket 60-40 agsipud ta awan pay ti pannakaabakna.

Ngem kellaat a nagbaliw ti pul-oy idi nagkita dagiti dua iti ay-ayam ti Miami Heat ken Milwaukee Bucks iti Miami. Ditoy a nangrugi ti panagtinnawag dagiti dua ket binisita pay ni Mayweather ni Pacquiao iti nagdagusanna nga otel.

Ket itay Pebrero 20, inwaragawagen ni Mayweather a pinirmaannan ti kontrata iti panagsangoda ken ni Pacquiao inton Mayo 2.

Ngem iti daytoy a boksing, liamado ni Mayweather ken underdog ni Pacquaio. Saan a malapdan daytoy agsipud ta malaksid nga awan pay ti pannakaabak ni Mayweather, nalataken a boksingero iti Estados Unidos nga addaan kadagiti rinibu nga agraem kenkuana a boxing fans.

Ti saludsod: Ania ti tsansa ni Pacquiao iti panagboksingda ken ni Mayweather?

Sungbat: Dakkel. NGEM masapul nga ipaigidna pay dagiti adu a pakakumikomanna iti telebision, pelikula, musika, ken iti basketbol kas playing coach ti maysa a propesional basketball team, malaksid laeng iti pagrebbenganna kas agilinlinteg iti Kongreso, tapno ipamaysana ti panangisaganana iti bagina iti daytoy kadakkelan a pannakirupakna iti ring.

Maaramidna ngata daytoy iti dua bulan laeng a panagsanayna?#