EDITORIAL: Kapit sa Patalim

SAAN a maikanatad ti gubat. Saan a nainkalintegan.

Masaludsod: mano a biag ti naisakripisio gapu laeng iti panagpingki dagiti ideolohia? Mano a pamilia ti nadislugar gapu iti pannakaipatngada iti arena ti pagbabakalan? Mano ti dagup dagiti sanikua, pagtaengan, ken dingnguen ti nadadael ken natay?

Iti biang ti turay, mano dagiti nabusbos para kadagiti ramit ken armas a pakigubat dagiti soldado tapno masalakniban ti kappia? Ditayon iraman ditoy ti iliw, amak ken ngatangata dagiti pamilia nga agpampanunot iti kasasaad dagiti patpatgenda nga adda iti pagbabakalan.

Kadagiti biktima ti gubat, magatadan kadi dagiti aliaw, kinadaksanggasat ken duadua iti nalidem a masakbayan nga agur-uray iti pamiliada?

Itay laeng nabiit, nairakurak kadagiti warnakan ti panagraira ti prostitusion kadagiti evacuation camps sadiay Zamboanga City kas iti Joaquin F. Enriquez Memorial Sports Complex ken nakaipasdekan dagiti tents iti Cawa-Cawa Boulevard.

Nagkas-ang a maammuan a kapilitan nga ilako dagiti babbai a biktima ti gubat ti bagida manipud iti P25 agingga iti P300 tapno laeng adda pangalaanda iti pangsilpoda iti inaldaw-aldaw a pagbiagda.

Piton a bulan manipud iti nagpaing dagiti umili kadagiti evacuation centers kalpasan a rinaut dagiti kameng ti Moro National Liberation Front dagiti sumagmamano a villages iti Zamboanga City.

Iti agdama, addada pay la iti evacuation camps agsipud ta saanda pay a makasubli iti dati a pagindeganda. Kabayatanna, mapukpukawen ti namnamada nga agbiag a normal gapu iti kaawan ti panggedan a maipaay ti gobierno kadakuada.

Iti dayta a situasion, ania ti namnamaen nga aramiden dagiti biktima ti gubat? Kapilitan nga uray tadem, kaptenda tapno agbiagda. Uray dayawda, ilakoda tapno adda maisubo nga innapuy dagiti pamiliada.

Kasapulan dagitoy iti naan-anay nga imatang ti gobierno. Kasapulanda ti pannakasappuyot tapno makatakderda ken agbiag a kas disente nga umili.

Iti Mindanao laeng daytoy. Di pay nadakamat dagiti biktima iti panag-rupak ti NPA ken ti turay.

Dakkel a perhuisio ti ipaay ti gubat. Adu ti ramaramenna. Dagiti umili ti kangrunaan a biktima iti panagdinnangir dagiti ideolohia.

Saan a maikanatad ti gubat. Saan a rumbeng nga agsagaba dagiti tattao gapu iti gubat.

Ngem kaanonto nga ag-sardeng ti gubat? Kaanonto a parmeken ti kappia ti gubat?

Ken apay a datayo a Filipino met laeng ti agsisinnida? Maymaysatayo a puli, ket rumbeng laeng a kappia koma ti agari iti kaunggantayo.#