EDITORIAL: Kappia iti baet ti Gobierno ken Komunista

Kaanonto ngata a magibusan ti uppat a pulo ket piton a tawen a panagrangranget dagiti tropa ti gobierno ken dagiti rebelde a komunista? Adu unayen a biag dagiti naibuis itoy a gubat nga awan ti mangabak, ngem agpadpadada a maabak ta dagiti agpimpinnatay ket parehas a Pilipino.

Sayang ti naibabawi a unilateral ceasefire tapno marugian  koman ti kappia iti nagbaetan dagiti puersa ti gobierno ken rebelde a New People’s Army – Communist Party of the Philippines – National Democratic Front. Improklamar ni Presidente Rodrigo Duterte ti unilateral ceasefire iti nagbaetan ti gobierno ken dagiti rebelde a komunista kabayatan ti umuna a panangiwayatna ti State of the Nation Address kas peace-building measure sakbay ti pormal a pannakairugi ti peace talk iti baet ti gobierno ken dagiti makakanigid a grupo sadiay Oslo, Norway inton Agosto 20 – 27, 2016.

Dua nga aldaw laeng kalpasan a naimandar kadagiti tropa ti Armed Forces of the Philippines ken Philippine National Police ti pannakasuspender dagiti operasion kadagiti komunista ket inambus dagiti rebelde dagiti kameng ti Citizens Auxiliary Force Geographical Unit nga agaw-awiden iti kampoda sadiay Barangay Gupitan Kapalong, Davao Del Norte a nakatayan ti maysa ken nakasugatan ti uppat a miembro. Nakasuron ni Duterte iti pannakaambus dagiti CAFGU ket nagballaag ken nangted ti deadline kadagiti rebelde nga ipalawagda ti napasamak ta no saan ket ibabawina ti indeklararna a ceasefire.

Imbabawi ti Presidente ti ceasefire kalpasan ti intudingna a deadline nga awan ti naawatna a palawag dagiti rebelde a komunista. Namandaren dagiti tropa ti AFP ken PNP iti panagsublida kadagiti normal nga operasionda.

Masayangan ni Presidential Adviser for Peace Process Jesus Dureza ken dagiti peace negotiator iti gobierno ken CPP – NDF gapu iti pannakaibabawi ti ceasefire a nanamnama a no nagpaut koma ti pannakaisardeng ti panagraranget ket nasayaat a pangrugian ti panagsasarita ti kappia. Mangnamnama pay laeng da Dureza ken Jose Maria Sison, Founding Chairman ti CPP – NPA nga addanto bilateral ceasefire iti nagbaetan ti gobierno ken rebelde, ken maituloy ti peace talk tapno magun-oden ti mataginayon a kappia iti nagbaetan ti gobierno ken dagiti rebelde a komunista.

Kas paset ti confident-building measure ti Presidente, dinutokanna a kameng ti gabinete dagiti dua a nominado dagiti makannigid a grupo a da Social Welfare and Development Secretary Judy Tagiwalo ken Agrarian Reforms Secretary Rafael Mariano. Desidido pay ni Duterte a mangwayawaya kadagiti nakabalud a political prisoners a kidkiddawen ti CPP – NDF a maruk-atan ngem nasken ti panagdalanda iti umno a proseso. Ngem addan sa met dagiti naikappeng iti makannigid a grupo a saan a disnudo a mangabrasa ti kappia?

Panawenen a magibusan ti nabayagen a panagraranget dagiti tropa ti gobierno ken dagiti rebelde a komunista ta saan a rumbeng nga aggugubat dagiti agpapada a Pilipino. Adu unayen dagiti pangta iti seguridad ti pagilian. Mainayon pay a parikut ti gobierno ket dagiti rebelde a Muslim – ti Moro Islamic Liberation Front ken Moro National Liberation Front; sabali pay dagiti terorista a grupo – ti Abu Sayyaf Gruop ken Bangsamoro Islamic Freedom Fighter. Kangrunaanna ti pangta iti South China Sea wenno West Philippine Sea kontra iti China. Billion a pondo ti gasgastosen ti gobierno iti panangmantiner ti seguridad ti pagilian, imbes koma a mausar iti pannakapadur-as ti ekonomia ken kasasaad dagiti umili.

Adda dagiti lapped iti pannakagun-od ti mataginayon a kappia iti nagbaetan ti gobierno ken dagiti rebelde a komunista kas ipakita dagiti aggandat a mangsabotahe ti main-inaw a peace talk. Namin-adun a daras a naidiaya ti kappia kadagiti rebelde iti naglabas nga administrasion, ngem napaay gapu ta adda dagiti tattao a dagiti bukodda nga interes ti ipangpangrunada imbes a pagsayaatan ti sapasap a pagilian.#