EDITORIAL: Kas sadiri ti pagilian, rumbeng laeng a tulongan dagiti mannalon

Ditoy pagilian, dagiti mannalon ti maysa kadagiti mapaliiw a saan unay nga ik-ikkan ti gobierno iti naan-anay a suporta. Kapaliiwan a no adda man maiburay a parabur kadakuada, sagsagginnit laeng iti baet a dagitoy ti maibilang a duri ti pagilian agsipud ta isuda ti nakaipabaklayan iti pannakapataud iti taraon dagiti umili ti pagilian.

Kas iti napalabas a panangsaplit ti bagyo iti pagilian a nakadidigraan kadagiti rinibribu nga umili, ad-adda a dagiti naapektaran a pampamilia kadagiti nalayus a probinsia ken siudad ti ad-adda a nakaituonan iti tulong ken pannaranay manipud kadagiti agtuturay ken dagiti nadumadma a gunglo sibiko ken uray kadagiti internasional a gunglo ti kaasi.

Kapaliiwan ketdi nga iti baet a maysa kadagiti kangrunaan a naapektaran dagiti mannalon gapu iti pannakalayus dagiti pinagayan, minaisan, kanatenganda, awan ti madagdagus a naited a tulong a ninamnamada manipud iti lokal ken nasional a gobierno a rumbeng laeng a mangbitibit kadakuada iti panawen ti didigra ken kalamidad.

Iti pannakalayus dagiti kataltalonan, nagpukaw la ketdi iti dakkel dagiti mannalon, karaman a naiyanud saan laeng dagiti nagbannogan, naggastosan ken nagsakripisioaanda no di pay nairaman a nairareb iti kapitakan ti namnamada a nabun-as nga apit tapno adda met laeng mapastrekda para iti masakbayan ti pamiliada. Nangnangruna a nakaladladingit no inutangda pay ti kuarta a binusbosda para iti panagtalonda. Iti pannakalayus iti talonda, pangalaanda ngarud pay iti pagbayadda iti utangda? Saan a masaaw a manayonan latta ti utangda,

Iti daytoy a gundaway, kasapulan dagiti mannalon iti madagdagus a pammitibit manipud iti nasional ken lokal a gobierno tapno baliwanda ti tumakder manipud iti didigra a sinagabada.

Saruronganmi ti kinuna ni Sen. Francis Escudero a rebbengna laeng a masaranay ken mabitibit dagiti mannalon tapno dumakkel ti produksion ti taraon iti pagilian babaen ti pannakaiwalin ti maysa a balangan a manglapped iti yaaddangda nga agpasango. Ti pannakapakawan dagiti utang dagiti mannalon ti dakdakamaten ni Sen. Escudero nangruna ita ta nadidigrada unay gapu kadagiti napalabas a bagyo.

Mamatikami pay iti singasing ti senador a maikkat koma ti bayadanda para iti pannakaaramat dagiti kanal ti irigasion a paglasatan ti danum a dumanon iti talonda. Iti bukodmi a kapanunotan, saan a maikanatad a pagbayaden dagiti mannalon iti pannakaaramat iti kanal ti irigasion tapno laeng mapalayasan ti talonda. Kasano a makaalun-on dagiti mannalon iti kinakurapay no ingget dagsen dagiti kawar a maipataw a pagbusbosanna nga ad-adda ketdi a mangilumlom kenkuana iti kapitakan a pagbibiaganna?

Kas nakuna ni Escudero, agtultuloy latta nga isyo ti inseguridad ti taraon agingga a saan a mapakan dagiti umili ti bukodda a bagi ken no adda garantia kadagiti mannalon a makapatanorda iti umdas a taraon, saan laeng a para iti pamiliada no di pay matun-oyanda ti nutrisional ken pinansial a kasapulanda.#