Impila ni Senador Chiz Escudero ti maysa a gakat iti Senado a mangpukaw iti discretionary powers ti Philippine Charity Sweepstakes Office Board mainaig iti disbursements ti charity funds daytoy nga opisina kalpasan a naibutaktak ti saan a nasayaat a pannakaaramat dagiti multibilion a pondo ti nasao nga opisina para kadagiti programana ti charity.
Madakamat ditoy a mabingay dagiti neto a mapastrek ti PCSO iti 55% – 45% a distribusion. Agdagup iti 55% ti mailatang para kadagiti premio ken gunggona idinto a 45% para iti charity fund (minimum a 30%) ken mabusbos iti operasion ken capital expenditure (15%).
Kuna ti Commission on Audit nga agdagup iti P6.2 bilion ti disbursements ti PCSO manipud iti pondona iti charity a pakairamanan ti intelligence funds.
No patien ni dati a PCSO general manager Rosario Uriarte, naaramat ti P150 milion nga intel funds para kadagiti operasion tapno mapapigsa ti Small Town Lottery ket mapukaw ti hueteng ken dadduma pay nga illegal a numbers games, kasta met kadagiti operasion maikontra kadagiti text scammers, fixers ken illegal a pannakailako dagiti naidonar ti PCSO a medisina.
Naisawsaw pay ti nagan ti sumagmamano nga obispo iti kontrobersia gapu iti panagbalinda a benepisario ti pondo manipud iti PCSO. Insubli dagiti obispo dagiti lugan iti baet nga inyunay-unayda nga inawatda dagitoy nga awanan malisia ken inaramatda saan a para iti bukodda a pagimbagan no di para kadagiti kailianda.
Naibutaktak pay nga adda dagiti probinsia a nagadu ti naited nga ambulansiada (ditoy Ilocos Sur laengen, nasurok a 20 ti ambulansia a naalana) idinto a maysa wenno awan pay kadagiti sabsabali a probinsia. Kinuna ni Vice Governor Deogracias Victor Savellano a kumpleto dagiti dokumento dagiti ambulansia ken naaramatda para iti serbisio iti salun-at.
Ngem iti immuna nga innem a bulan laeng iti 2010, nakirausanen ti P150-M nga intelligence funds ti PCSO ta nabusbosnan ti nasurok a P138 milion ket aganay laengen a P14 milion ti nabati.
Nadagsen ti alegasion dagiti sumagmamano a senador: naaramat ti nasao a pondo para iti eleksion idi 2007.
Babaen ti nasao a gakat ni Sen. Escudero, maikkat ti discretionary powers ti board mainaig iti distribusion dagiti pondo ti PCSO ken ti pannakaituding dagiti ispesipiko a pakaipananda kas maibatay iti ispesipiko ken pudpudno a kasapulan dagiti probinsia ken iti polisia ken mandato daytoy nga opisina.
Ituding pay ti nasao a gakat a kasapulan ti approval ti Opisina ti Presidente no kasapulan ti board ti mangilatang iti nasursurok ngem iti 15 porsiento iti pundo ti charity daytoy.
Ala, mangnamnamatayo a makaluban daytoy a gakat dagiti lussok iti mandato ti PCDO, bareng mailinteg pay ti killo.#
