EDITORIAL: Kasapulan ti no-nonsense a panagpalutpot

Dakkel a pakaibabainan ti Pilipinas ti eskandalo mainaig dagiti maimulmula a bala iti bag wenno bagahe dagiti bahero nga aglasat iti Ninoy Aquino International Airport.

Saan laengen a napudot a topiko kadagiti social media websites, nagbalinen a nabara a pagdidiskusionan iti sangalubongan daytoy nakababain nga aramid.

Ania ngarud, ta itay laeng nabiit, dua manen ti nagbalin a biktima iti tanim bala scam. Nasukalan iti bagahe ti maysa a Hapones ti maysa a bala ti 9mm idinto a bala para iti karbin ti nasukainan iti bag ti kalugarantayo nga agbiahe a mapan Hong Kong.

Itay laeng nabiit, naiposte iti Facebook ti maysa a video a nangipalawagan dagiti TV host no kasano a nalimed a maimula wenno maitinnag ti bala iti bag ti maysa a turista wenno agbiahe.

Naiposte pay ti kaburnok dagiti agpabungon kadagiti bag wenno bagaheda iti plastik gapu iti amakda amangan no agbalinda a biktima iti tanim bala. Ditoy laeng pagilian ti pakapasamakan ti kastoy nga imbes a masaluadan dagiti sumangpet nga OFW ken turista, matinnagan dagiti bagaheda iti bala tapno adda pamkuatan dagiti buklis a taga-NAIA a mangkotong kadagiti biktimada!

Ngem ti dakkel a pakaibulosan ti pungtot iti barukong ti mapaliiw a kaawan ti addang dagiti agtuturay iti NAIA a mangpasardeng iti daytoy nakababain nga aramid.

Idi pay la 2005 a naireport iti kaadda dagiti biktima iti tanim bala ngem agingga ita ket di man marikna wenno makita dagiti otoridad ti implikasion daytoy nakababain nga aramid iti imahe ti pagilian.

Ita pay laeng, maysan a dakkel a pagilian ti nangibilin kadagiti umilina iti panagannad iti bullet planting modus operandi iti NAIA.

Adu metten dagiti kailian nga ti agsarugaddengen nga agbakasion ditoy pagilian gapu iti amakda nga agbalinda a biktima iti tanim bala iti NAIA.

Nababain nga aktibidad. Saanda ngata a mapanunot nga agballatek met la kadakuada ti kaawan panangitaltalekda iti mapaspasamak iti NAIA – maimula la ketdi iti panunot dagiti biktima ken uray dagiti umili nga adda bingayda kadagiti nalimed a transaksion no sadino nga agbayad lattan ken agulimek ti biktima iti daytoy nalawag a panagkikil dagitoy nga alimatek iti NAIA.

No saanda a kabaelan a pugipogen daytoy nga aramid, nasaysayaaten nga aglusulosda laengen iti puestoda. Saandan nga urayen pay iti Presidente a mangikkat kadakuada.

Wen, kasapulanen ti pannakaiwayat iti nainget ken no-nonsense a panagpalutpot, saan laeng a babaen ti National Bureau of Investigation no di pay iti Senado tapno mapugipog daytoy nakababain nga aktibidad a mangmangted iti narugit a mantsa iti imahe ti pagilian.
Asinoman a masukalan nga adda nakainbolbaranna iti daytoy nakababain nga aramid, ket maipakat koma nga awan ti santuenna ti linteg.#