EDITORIAL: Kasla bola a masiksikkarud

Kasla bola a masiksikkarud dagiti kailian nga agtrabtrabaho iti ballasiw-taaw nangruna kadagiti pagilian a nariribuk.

Pagarigan laengen iti Thailand. Rimmikut ti talingenngen ti politika iti dayta a pagilian agingga iti naipakat ti martial law. Naipit dagiti trabahador a kailiantayo idi impaulog ti Department of Foreign Affairs ti alert level 2 kadagiti Filipino workers.

No alert level 2, maballakadan dagiti kailiantayo a sisasaganada a maibakuit iti nataltalged a lugar wenno aggawidda iti pagilian.

Pagpipiaanna, sumaysayaaten ti kasasaad ti politika iti Thailand. Ita, kuna ti gobierno a mabalinen dagiti trabahador a kailiantayo ti agsubli, uray dagiti agap-aplikar iti trabaho iti nasao a pagilian.

Kasta man met laengen iti Iraq. Itay nabiit, rumikrikut ti kasasaad sadiay. Agsasarunon ti panagrupak iti nagbaetan dagiti militante a jihadist ken security forces nga Iraqi. Iti ababa a pannao, saanen a malapdan ti riribuk iti dayta a pagilian.

Ita, impaulog ti DFA iti crisis alert level 4. Kayatna a sawen, maipakat ti mandatory repatriation wenno pannakapagawid dagiti trabahador a Filipino.

Kas pangpakalmana kadagiti kailiantayo, kinuna ti DFA a tumulong iti mabusbos iti panaggawid dagiti OFWs.

Ngem kasta kadi kalakana a pumanaw lattan dagiti kailiantayo iti pagtrabahuanda?

Narigat nga annugoten, ngem kaadduanna kadagiti  kailiantayo nga agtrabtrabaho iti Thailand wenno iti Iraq ken uray iti sabsabali a pagilian ket bumdeng nga aggawid lattan uray no agsisimparaten dagiti kanalbuong ken panagbettak dagiti bomba ken agpeggaden ti bukodna a biag.

Saantayo a mababalaw ida agsipud ta posible nga awan pay ti naurnongna wenno pagpletena nga aggawid. Wenno dakkel ti nautangna iti panagabrodna ket awan pangalaanna iti pagbayadna iti utangna.

Kapit sa patalim a kunada. Uray ammona nga agpeggad ti biagna, kapilitan a sarakusokenna tapno laeng makatged iti ipaw-itna iti pamiliana.

Annugoten man ti gobierno wenno saan, pumanaw dagiti kailiantayo agsipud ta nakisang ti mabirokan a panggedan ditoy pagilian. Wenno no adda man panggedanna, nababa unay ti sueldo ket saanna a mabiag ti pamiliana iti disente a wagas.

Saan a pumanaw ni Filipino iti pagilianna no adda natalged a pagsapulanna tapno disente a mabiagna ti pamiliana ken maaddaanda iti naraniag a masakbayan.

Daytoy koma ti ad-adda  a pangipaayan ti gobierno iti imatangna, saan ketdi a pinnolitika nga ad-adda laeng a mangidagel kadagiti marigrigat a kailiantayo!