EDITORIAL: Kasla pilid nga agtulid ti panawen

ITAY Mayo 29, nupay aguy-uyek ken adda panatengmi, nagbiahekami nga agpasiudad tapno atenderanmi ti panagkasangay ti kakaisuna nga apomi. Dua nga aldaw sakbayna, nakaawatkami iti text message manipud iti apomi (wen, iti tawenna nga innem, ammonan ti agipatulod iti text message babaen ti selpon!) a nagdamaganna no kaano a lumuasak nga agpasiudad. Nupay dina imbaga, ammok lattan a tarigagayna nga addaak iti kaaldawan ti kasangayna. Umuna, siempre, adda itedko a regalona. Maikadua, adda kaay-ayamna ken agdengngeg kadagiti kanta ken estoriana. Maikatlo, addaak a bumayabayt kenkuana nga agdrowing kadagiti prinsipe ken prinsesa iti lubong dagiti engkanto ken kinadatdatlag.

Iti daytoy a tawen, sinelebraran ti apomi ti maikapito a tawenna iti swimming pool iti Clubhouse ti Greenwoods. Siam a kasingedan a gagayyemna ti sangailina. Pancit, spaghetti, barbecue, hot dog ken orange juice ti saganana. (Sabali ti pulotan nga insagana dagiti dadakkelna a para kadagiti nataengan).

Bayat ti panaglalangoy ti apomi ken dagiti sangailina iti swimming pool, tumtumpaw dagiti nasinggit a garikgik ken arianggada. A, ti lubong ti kinaubing ken kinainosente! Iti daytoy a lubong, awan dagiti problema mainaig iti pinansial, awan kinagamrud, kinabuklis, korapsion, panagtakaw iti kaban ti gobierno, panagsaburno, ken dadduma pay a kinadangkes.

Bayat ti panagbuybuyami kadagiti aglalangoy nga ubbing, dimi naaluadan ti pannakaibulos ti sennaaymi. Iti dayta a darikmat, sabali a rikna ti immapon kadakami. Nupay maragsakankami ta nadanon manen ti apomi ti sabali pay a tawen a panagkasangayna, dimi nalapdan ti isasangbay ti saem iti kaungganmi. Wen, adda panawen ti amin a banag ditoy rabaw ti daga. Adda panawen ti pannakaipasngay ken panawen ti ipupusay; panawen ti panagmula ken panawen ti panagapit; panawen ti ragsak ken panawen ti liday.

Ala, kasta ti biag, kasla pilid nga agtulid. Agsirkulo. Kas iti init a sumingising iti daya; agampayag iti lulonan iti agmatuon santo agpababa nga agtabon iti laud! Madamdama, agdalapdap ti sipnget iti isasangbay ti rabii, santo agbannawag iti pannakaipasngay ti sabali manen nga agsapa!