EDITORIAL: Kayattayo man wenno saan, apektadotayo iti krisis iti Greece

Iti sanguanan ti kumarkaro a krisis a pinansial iti pagilian a Greece, mangrugin a lak-amen dagiti umilina, uray dagiti adda kuarta ken depositoda iti bangko ti pannakaparigatda iti panaggasto ken transaksionda iti inaldaw-aldaw a panagbiagda.

Naglak-am iti kastoy da Valasia Limnioti ken Konstantino Patronis, kakaskasar a Greko bayat ti kaaddada iti New York City a nagtarusanda bayat ti panagbaniagada kas paset ti honeymoonda nga agassawa.

Nangrugi ti “batibat” dagiti dua idi saan a binigbig ti otel a naggiananda ti visa credit card ken debit card nga iggemda. Kapilitan a nagbayadda iti cash. Sumagmamano pay nga aldaw, naibbusen ti kuartada agsipud ta saanda met a maaramat dagiti cardda.

Sumagmamano nga aldaw a saan a nangnangan dagiti dua kas panagin-inutda ken panangiyanayda iti kuartada.

“Dua nga aldaw a nabisinankami. Nagsangsangitak ta kayariganmi ti agalla-alla iti New York,” kinuna ni Limnioti.

Pagyamanan ta adda inyarayat a kuarta ti St. Demetrios Green Orthodox Church ken ti St. Irene Chrysovalantou a ginasto dagiti agassawa agingga iti nagbiaheda nga aggawid iti Greece a pagilianda.

Saan laeng a da Limnioti ken Patronis ti aglaklak-am iti pannakaparigat mainaig iti kuarta a gastuenda no di pay dagiti kailianda nga aggigianen iti sabali a pagilian agsipud ta kaarigna awan pategda a papel ti kuartada.

Maigapu daytoy iti sagsagrapen ita ti Greece a pinansial a krisis. Ngamin, dakkel unayen ti utang daytoy a pagilian ket saannan a kabaelan a bayadan pay dagiti internasional a bangko a nagpautang kenkuana. Madakamat ditoy nga iti kallabes, tinultulongan dagiti creditors ti gobierno ti Greece tapno laeng makaanges iti nakailumlomanna nga utang. Ngem kimmaro ketdi ta saan a maalimon ti gobierno a suroten dagiti kondision a kayat dagiti lending institutions a maipakat, kas iti panangtimbeng iti panaggasto, pannakaipangato ti buis ken pannakinegosiar kadagiti nagpautang.

Akuen man wenno saan dagiti pinansial a mamagbaga iti pagiliantayo, dakkel ti epektona kadatayo no di marisut ti Greece daytoy a pinansial a krisis a nagramut iti pannakailumlomna iti utang a dina kabaelanen a bayadan. Ta kas iti Greece, dakkel met ti utangtayo kadagiti ganggannaet a financial institutions. Dakkel ti ilatlatang ti gobiernotayo manipud iti badiet a pagbaybayad kadagitoy nga utangna. Kayattayo man wenno saan, kasapulan a bayadantayo ti utangtayo tapno saan a maitsa-pwera ti pagiliantayo. No saantayo nga agbayad wenno makabayad, mapukaw ti dayaw ti pagiliantayo; awanton ti mangpautang kenkuana.

Kayattayo kadi ti maipada iti Greece?