Footer

EDITORIAL: Kinamanagladladaw, maiwagat koman

Maysa a kasapulan a pukawen ni Filipino a kaugalian ti saanna a panangsurot iti nakaiskediul wenno naituding nga oras a panangrugi iti pasken, okasion, miting wenno kumperensia. Agingga ita, kapaliiwan latta a saan a masursurot ti makunkuna a ‘punctuality’ gapuna a saan a mairugi dagiti aktibidad iti naituding nga oras gapu ta tagtagiuray ti isasangpet dagiti agtuturay wenno dagiti kangrunaan a sangaili.

Mababbabalaw ni Filipino gapu iti daytoy a kaugalianna – Filipino time – a pakadadaelan ti imahena agsipud ta napateg ti punktualidad iti internasional a komunidad nangruna iti negosio ken industria.

Napaliiwmi manen a saan latta a maiwalin daytoy ugali kadagiti pasken nga insayangkat ti gobierno probinsial itay nabiit.

Pagarigan ti Tourism Summit. Ag-alas diesen, madama pay la ti registration, bassit pay dagiti timmabuno ken awan pay a makita uray maysa a turayen a maseknan iti nasao a summit.

Maysa nga aldaw koma ti nasao a summit tapno mapapigsa ti turismo iti probinsia. Ngem iti nakaladladaw a pannakairugina sakbay ti pangaldaw, sa adda pay bitbitla a pangipaduyakyak iti kinapateg ti nasao a summit tapno mapabileg ti turismo iti probinsia, agdapag a sumagmamano laeng nga oras a nagtugaw dagiti partisipante tapno tratarenda dagiti problema ken gannuat a kasapulan tapno mapadur-as ti turismo iti probinsia. Iti dayta a kabassit ti tiempo, awan duadua a ‘nakusel’ la ketdi ti ‘sagana’.

Kastoy met ti kapaliiwanmi iti pannakapili ti Miss Saniata ti Ilocos Sur. Idi mangrugi ti pageant, alas dies y median ket adun a tattao ti natektekan nga agur-uray. Adu pay ketdin dagiti naggawid gapu ta ingget ladaw dagiti mangimaton iti pageant ken dagiti kandidata a simmangpet. Napia koma no adda nagpabuya a manglinglingay kadagiti tattao tapno saanda a kumulaiseg iti tugawda. Ngem diay ketdin makasuya a boses a mangipaspasindayag iti ‘kinapintas’ ti probinsia ti mangkurkurikor iti lapayagda.

Kastoy manen iti maudi a rabii ti festival a pannakaipabuya ti maysa a zarzuela ilocana. Saanen a makatalna dagiti tattao gapu ta di met la mangrugin ti pabuya. Anta, adda pay laeng nga agraragsak dagiti kangrunaan nga agbibiag iti Burgos Museum a pangipakitaanda kano iti namaris a panagbiag dagiti Kastila.

Ti nasapsapa nga isasangpet dagiti bokal iti session ti kiniddaw ni Bise Gobernador Jeremias Singson tapno ad-adu ti matratarda a gakat a naidatag iti hunta probinsial.

Segun iti bise gobernador, no masurot laeng ti sursurotenna a pagsasao a “My Time is on time”, ad-adu pay ti magapuanan ti hunta probinsial para iti pagsayaatan dagiti umili.

Panawenen a pukawen daytoy saan a maipagpannakkel nga ugali ni Filipino, uray dagiti Ilokano, agsipud ta napateg ti oras. Balitok ti oras iti daytoy a panawen ti krisis pinansial a sagsagrapen ti sangalubongan.#