Footer

EDITORIAL: Kooperasion ti amin ti kasapulan no adda sumangbay a didigra

   Itay nabiit, sinagrap ti Central ken North Luzon dagiti panagawan ti koriente a nagpaut manipud iti maysa nga oras agingga iti siam nga oras. Ditoy Vigan City, idi Huebes, nagawan ti koriente iti alas siete ti rabii ket nagsubli iti alas onse.  Nagpukaw manen ti koriente iti agarup alas tres ti parbangon sa nagsubli met laeng kalpasan ti maysa nga oras. Idi Biernes, nagpukaw ti koriente iti maysa nga oras laeng ket napalalo a yaman dagiti consumers a nakasagana man koman nga agsagaba iti naun-unday nga oras.

Kasta ti saan a kinatalingenngen ti kasasaad ti koriente iti Central ken North Luzon maibunga iti panangduprak ni Bagyo Glenda iti Akin-abagatan a Luzon manipud idi Mierkoles. Nupay bassit ti inkuyog ni Glenda a tudo ngem ingget pigsa ti angin ket daytoy iti nangduprak kadagiti pagtaengan, nangtuang kadagiti kayo ken poste ti komunikasion ken elektrisidad a nakaigapuan ti panagpukaw ti koriente kadagiti probinsia a naglasatanna a pakairamanan ti Metro Manila.

Gapu iti kaadu dagiti linia ti koriente a nadadael, adu a planta ti koriente ti saan a makapartuat iti umdas a power a nagtungpal iti saan a pannakabael ti Luzon grid a suplayan ti kasapulan nga enerhia ti Central ken North Luzon. Nababa ti reserba idinto a nangato ti kasapulan nga enerhia isu a kapilitan nga impakat ti NGCP ti rotating brownouts ditoy a paset ti pagilian tapno saan a maspak ti sibubukel a Luzon grid.

Ngarud, idi Huebes ken Biernes, sumanultip dagiti tattao, nangruna dagiti marigrigat ken dagiti biktima ti bagyo, gapu kadagiti problema a pinarnuay iti kaawan ti koriente. Malaksid a problemada ti pangalaanda iti lutuenda agsipud ta awan ti naikaluyada gapu iti pigsa ti tudo ken angin a nangisualit kadagiti pagtaenganda. Dagiti met dadduma, dida makaluto ta nabbasa dagiti pagtungo, bimlad dagiti bagasda, ket nagpannurayda lattan iti saranay manipud iti gobierno.

No adda linukaisan ti napalabas a bagyo, awan sabali no di ti agdadata a kinapudno a saan a makapnek ti panagsagana ti gobierno no kastoy nga adda sumangbay a didigra wenno kalamidad.

Daytoy naudi a bagyo a Yolanda, agingga ita ket adu pay a kailian a biktima ti bagyo ti agur-uray iti tulong tapno makabangonda iti nakaidalebanda. Agpayso, ar-aramiden ti gobierno nasional amin a kabaelanna a mangsaranay kadagiti biktima ngem saan koma nga agpatingga lattan dita. Kasapulan a mangiwayat kadagiti gannuat wenno programa tapno adda kaptan dagiti biktima nga agbiag a disente iti bukodda a ling-et a saanda a paduduolan lattan manipud iti gobierno.

Panawen metten nga ipaayan ti gobierno iti imatang no kasano a mapabassitna pay ti bilang dagiti biktima ti kalamidad. Kasapulan nga ipakatna a siiinget ti preemptive evacuation no adda sumangbay a bagyo aglalo kadagiti lalayusen a lugar ken kadagiti coastal barangays. No kasapulan a bagkatenda dagiti nasukir nga umili, bagkatenda dagitoy. Kasapulan met nga addan nakasagana a pakaibakuitan dagiti tattao sakbay a sumangbay ti bagyo.

Iti daytoy, disiplina ti kasapulan, nangruna kadagiti umili. Saanda koma a bumdeng a pumanaw iti lugarda no addan ballaag manipud iti gobierno nga agbakuitdan. Ti rigatna, adu dagiti natangken ti uloda a sada la agkarattot nga agbakuit no kasta unayen ti pamsaakan ti bagyo wenno malneden ti balayda gapu iti layus.#