Footer

EDITORIAL: Korapsion: mangirarem kadagiti napanglaw

Segun iti panagadal nga insayangkat ti United Nations Development Program, rakraken ti korapsion dagiti demokratiko nga institusion, pagkuritegenna ti panagdur-as ti ekonomia ken tumulong a mangkibkib iti  kinatalingenngen ti gobierno.

 

Saanen a baro daytoy a report manipud iti UNDP mainaig iti korapsion ditoy pagilian. Addan dagiti immun-una a report manipud kadagiti maraem a gunglo ken negosio a nangibatad a maysa ti Pilipinas kadagiti kakaruan iti korapsion iti dandani amin a pagopisinaan ti gobierno. Iti maysa a panagadal, mapattapatta nga aganay a P60 bilion ti mapukpukaw ti gobierno iti korapsion ken panagkunniber.

Ti makapadakes, dinakamat ti report ti maysa a global a panagadal nga ipababa ti korapsion ti income growth ti populasion nga adda iti akimbaba a 20 porsiente, kasta met a pabuntogen daytoy ti pannakaipabassit ti kinapanglaw ken kissayanna ti kinaepektibo dagiti sosial a programa.

Saan a nakakaskasdaaw dayta. Gapu iti korapsion, imbes a maipaay ti nasaysayaat a serbisio ken programa a makatulong iti panagdur-as ti panagbiag dagiti umili nangnangruna dagiti marigrigat, mapan laeng ti dakdakkel nga ilgat kadagiti buklis nga agtuturay, empleado ken dagiti adda iti asideg ti koridor ti turay.

Saanen a palimed a no kayatmo nga agdur-as ti gagaram iti maysa nga opisina, kasapulan nga adda iyapirasmo iti sirok ti lamisaan. Kasta met a no adda dagiti pagimbagan manipud iti  gobierno, ad-adda nga agtungpal dagitoy iti dakulap dagiti asideg a kabagian, gagayyem ken kasinged dagiti opisial.

Kasapulan ti reporma iti gobierno. Kasapulan ti panagdalus kadagiti opisina ti turay. Panawenen tapno ipakat ti gobierno ti sagatan tapno maiwalin saan laeng dagiti korap nga empleado no di pay dagiti opisial ken  mangidadaulo kadagiti pagopisinaan.

Ngem kasapulan ti political will. Uray asino ti mabaddekan. Iti daytoy laeng a wagas a mapasubli ti kredibilidad ti agdama nga administrasion.

Agingga nga adda dagitoy a tattao iti koridor ti turay, ditayo namnamaen ti pannakaited dagiti nasaysayaat a serbisio ken programa kadagiti umili, nangnangruna kadagiti marigrigat. Agtultuloy latta ti pannakairaremda iti kinapanglaw, kasungani iti agtultuloy nga ibubussog dagiti buklis nga agtuturayda.

Agingga nga adda dagitoy a tattao iti bwitre ti turay, ditayo namnamaen ti pannakaited dagiti nasaysayaat a serbisio ken programa kadagiti umili, nangnangruna kadagiti marigrigat. Agtultuloy latta ti pannakairaremda iti kinapanglaw, kasungani iti agtultuloy nga ibubussog dagiti buklis nga agtuturayda. Kaarigda iti alimatek nga agsepsep iti dara dagiti umili. Kaarigda dagiti bao a bimsog iti kaban ti turay.

Makunatayo: dinadael dagiti korap nga agtuturay ti kinasagrado ken kinadalus ti nagan ti opisina nga idauluan wenno pagtrabahuanda gapu ta rinimbawanen ti sileng ti pirak ken bileg ti kinataoda. Dagitoy ti mangibabbaba iti imahe ti pagiliantayo iti ganggannaet a pagilian.

Saan a napintas daytoy nga imahe iti maysa a katoliko a pagilian a kas iti Pilipinas.#