EDITORIAL: Kredibilidad dagiti Narcolist

NAMANTIAANEN iti panagdudua ti publiko iti kredibilidad dagiti mairakrakurak a “narcolist” wenno listaan dagiti tattao nga adda pakainaiganna iti illegal a droga iti pagilian.

Daytoy ti pinarnuay ti panagpadispensar ken panangaklon ni Presidente Rodrigo Duterte a biddut ti pananginaganna kadagiti tallo nga opisial ti Pangasinan nga adda pakainaiganda iti illegal a droga a da sigud a Gobernador ken agdama a Congressman Amado Espino, Board Member Raul Sison ken Provincial Administrator Rafael Baraan.

Nadayaw nga aramid ti panagpakumbaba ni Duterte – ti idadawatna ti dispensar ken panangaklonna ti responsibilidad iti biddut a pammabasol kadagiti inakusaranna. Ngem saanen a maliklikan a dagiti managamiris nga umili ti agdudua iti kinapudno dagiti akusasion ti Presidente kadagiti tattao nga imbutaktakna a nairaman iti narcolist.

Dayta a biddut ket pammaneknek a saan a naan-anay a mapagpiaran dagiti amin nga impormasion a naipadanon iti Presidente. Rebbengna a maimbestigaran no apay a nairaman iti listaan dagiti opisial iti Pangasinan, ken ti pannakaabsueltoda kalpasan ti pannakipagkita ni Espino iti Presidente.

Idi Agosto 15, 2016, imparang ni Duterte kadagiti kameng ti media ti drug matrix dagiti adda adda pakainaiganna iti illegal drug trade sadiay New Bilibid Prison kabayatan iti napalabas nga administrasion. Mainayon kada Espino, Sison ken Baraan, inakusaranna pay a protektor ti illegal drug trade da sigud a Justice Secretary ken agdama a Sen. Leila de Lima, sigud a Justice Undersecretary Francisco Baraan III, ken dati a Bureau of Corrections Director Franklin Bucayu. Innagananna pay ti driver ken bodyguard ni De Lima a ni Ronnie Dayan a kolektor ti drug money.

Sabali pay dagiti immuna a listaan nga inrakurak ni Duterte a nakainaigan dagiti dua a retirado ken tallo nga aktibo a heneral ti Philipine National Police ken dagiti naawagan iti Ninja cops, lokal nga opisial ti gobierno, hues, ken dagiti drug lords iti pagilian. Impakaammo ni Duterte nga adda pay sabali a narcolist nga irakurakna a mangipakita ti kinakaro ti problema ti illegal a droga ta naapektaranen ti 92% iti kadagupan dagiti amin a barangay iti Pilipinas. Impalgakna nga agarup 11,000 a pulis ken 16,000 a kapitan iti barangay dagiti adda pakainaiganna iti illegal a droga.

No mairakurak dagiti nagan a mairaman kadagiti narcolist, nakapappapatinto pay ngata kadagiti tattao uray no adda kinapudnona dagiti alegasion?

Ti panagbiddut iti pammabasol kada Espino, Baraan ken Sison ket ipaneknekna ti saan a naan-anay a kinapudno dagiti amin nga intelligence report mainaig kadagiti mairaman iti Order of Battle. Nasken ti naan-anay a pannakakompirma amin nga impormasion ken nasuportaran ti pammaneknek tapno saan a mailawlaw-an ken maibabain ti Presidente, ken awan ti mapadpadakes a tao.

Rebbengna a saan koma a mairakurak dagitoy a classified information kadagiti tattao nga awanan ti security clearance nangruna iti publiko. No adda naan-anay nga ebidensia ket naidarum koma dagiti maatap nga adda pakainaiganna iti illegal a droga. Ngem gapu iti taktika a “Named and Shamed” ti Presidente ket inagnagananna dagiti nagadun a tattao a mainaig iti illegal a droga uray awan ti naan-anay nga ebidensia.

Daksanggasat a pagteng ti kaadda dagiti inosente a tattao a mairaman iti narcolist ta nadagsen a pammabasol dayta ken dakes ti epektona kadagiti maseknan. Dakes ti parnuayen dagiti pammabasol nga awanan ebidensia kadagiti maakusaran ken pamiliada ta umanayen a pakadadaelan ti naganda nga itugtugotda agingga a sibibiagda. Saanda met ngarud a maidarum ti Presidente iti pamarpardaya gapu ta adda “immunity from suit” ti Presidente bayat ti panagtakemna.

Ngem nagasgasat pay laeng dagiti sibibiag a biktima ti pamarpardaya a namantiaan dagiti naganda, ngem dagiti biktima ti pammabasol ken pammapatay ta saandan a pulos a madependeran dagiti bagbagi ken dayawda. (Eden A. Alviar)