EDITORIAL: Kultura ti Kinadamsak

di pay kadagiti kaparangetna a probinsia ken iti intero a pagilian. Kaadduanna a nangisayangkat kadagiti pammapatay dagiti armado a tattao a riding in tandem wenno nagkalubbon iti motorsiklo. Mapapati a hired killers dagitoy a sisasagana a pumatay no paiggamam ida iti kuarta.

Itay laeng lawasna, pinapatayda ti maysa pay a hues iti Ilocos Norte. Saanda laeng a binagsol, ginerretda pay ti tengngedna. Idi kanikatlo a bulan, idi umuna a lawas ti Oktubre idi napan a tawen, pinapatayda ti maysa a hues bayat ti panagur-urayna iti luganna nga agpa-Vigan.

Ti saludsod: Kastoy kadin ti kinatured dagiti pumatay?

Makapariribuk iti panunot dagitoy a pammapatay ditoy pagiliantayo. Nabalinen a kasla piek ti pateg ti biag. No adda atrasom iti padam a tao, saanen a legal a proseso ti masurot, ad-addan a marisut ti atraso babaen ti murdong ti paltog. Kaarigen ti tao ti agbibiag iti aspaltado a kabakiran a pagay-ayuyangan ti kinadamsak ket dagiti laeng napigsa, nabileg, naturay ken natured ti rumabaw wenno agari. Maiwalin iti dalan dagiti nakapsut, awanan gaway, takrot,  managbuteng iti Dios.

Kasla awanen ti panangitaltalekda iti linteg,  a di maikanatad, saan a nakristianuan ken dakkel a basol iti imatang ti tao ken iti Dios ti panangkettel iti biag aglalo iti maysa nga inosente a tao.

Ania pay ti serserbi dagiti linteg, dagiti polis, dagiti hues no agraira lattan ti kultura ti kinadamsak iti pagilian?

Saan a tiempo ti panagtitinnudo no sino ti yan ti nagliway, nagkurang, nagkamtud wenno nagul-ulimek ken nagimbubulsek. Ta nasken ti pannakapasardeng a madagdagus daytoy a kultura ti kinadamsak a mangipapaay iti amak, aliaw, buteng ken aripapa kadagiti umili a tarigagayda ti agbiag iti sidong ti natalna, nakappia, natalingenngem a kagimongan.

Maysa ngarud a karit daytoy ti kapolisan. Saanda koma nga itulok a dildilatan lattan dagitoy a dakes a tattao ti rupada babaen dagitoy nadamsak a pananggudasda iti biag, urnos ken talna ket agtignayda koman tapno mapugipog ti kriminalidad ditoy pagilian.#