EDITORIAL: Kumplikasion iti panangibasura ti SC iti diskualipikasion kontra Estrada

Agpaypayagpag iti ulep ita dagiti pasurot ni dati a Presidente Joseph Estrada gapu iti desision ti Korte Suprema a nangibasura iti petision nga impila ni Atty. Alicia Vidal, abogada ni dati a Mayor ti Manila Alfredo Lim, a diskualipikasion kontra ken ni dati a Presidente Joseph Estrada idi nagtaray a mayor iti Manila.

Maipalagip a pinalubosan ti Commission on Elections nga agtaray a para mayor ni Estrada idi eleksion idi 2013 iti baet a nakonbiktar daytoy iti plunder iti babaen ti administrasion ni dati a Presidente Gloria Macapagal-Arroyo.

Inluges ni Estrada ni Lim iti dayta a panagsangoda para iti kinamayor iti Manila.

Iti maysa nga statement, kinuna ni Senador Jinggoy Estrada, agdama a nakadetene iti PNP Custodial Center gapu iti plunder charges, a ti desision ti Korte Suprema ket “panagballigi iti pagayatan dagiti umili nangruna dagiti botante iti Siudad ti Manila a mangpili iti kayatda a lider…”

Iti panagbubutos dagiti justices, 11 ti kontra iti petision ni Vidal a diskualipikasion ken ni Estrada idinto a tallo dagiti pimmabor.

Bimmutos para iti pannakaibasura iti petision da Justices Teresita Leonardo-De Castro, Presbitero Velasco Jr., Arturo Brion, Diosdado Peralta, Lucas Bersamin, Mariano Del Castillo, Martin Villarama Jr. , Jose Perez, Jose Mendoza, Bienvenido Reyes, ken Estela Perlas-Bernabe idinto a pabor iti petision da Chief Justice Maria Lourdes Sereno, Justices Antonio Carpio ken Marvic Mario Victor Leonen.

Iti panangipila ni Vidal iti petision para iti diskualipikasion ni Estrada iti panagkandidatona a para mayor iti Manila idi 2013, kinunana a saan nga eligible ni Estrada a tumaray para iti publiko a puesto agsipud ta nakonbiktar iti plunder iti babaen ti administrasion ni dati a Presidente Gloria Macapagal-Arroyo.

Ngem dinawat ti kampo ni Estrada iti Nangato a Pangukoman ti pannakadismis ti petision ni Vidal agsipud ta kualipikado daytoy nga agtaray iti elective position kalpasan nga impaayan ni dati a Presidente Arroyo iti pardon.

Segun iti abogado ni Estrada, absolute pardon ti naited ken ni Estrada ket napasublina amin a kalinteganna a sibil ken politikal.

“Epektibo a pinunas ti pardon amin dagiti pannusa a naiyapiring iti konbiksion ket insublina ken ni Estrada ti naan-anay a sibil ken politikal a kalinteganna,” sungbat ti abogado ni Estrada.

Ala, nagtimeken ti Korte Suprema pabor ken ni Estrada. Respetarentayo dayta a desision ti Korte Suprema.

Ngem adda masiripmi a komplikasion iti daytoy a desision ti Nangato a Pangukoman, nangruna ta adda dagiti nangangato nga elective officials a pakairamanan ni dati a Presidente Gloria Arroyo a naisaklang iti plunder.

Amirisentayo daytoy imbalikas ni Vidal: “Impilak ti kaso para iti masakbayan a henerasion. Adu dagiti sabali pay nga akusado ita iti plunder. Kalpasan ti konbiksion, mabalin a mapardonda manen, ken tumarayda manen para iti sabali a public office…”

Annugoten man wenno saan ti Malakaniang, dakkel ti impact daytoy a desision ti Korte Suprema iti political landscape iti eleksion inton 2016.#