EDITORIAL: Kung walang PDAF at DAP, walang mahirap?

Nasalimuot ti nagsasamusam nga scam, plunder, anomalia, tongpats, epal, kotong, padulas, pasuksok, kurakot, sobra-sobra a bonus, influence peddling ken dadduma pay a termino  pananggundaway iti padana a tao, iti ikub ti gobierno ken iti pribado. No daytoy ti barometro ti pulso ti gimong, makuna a bimmaban ti moralidad. Kasapulan ti atension, aksion ken solusion. Utoben no mabaybay-an nga agrakaya ti moralidad.

Nalebbeken kadagiti nagduduma a pananggundaway ti gimong iti agdama a panawen. Timmaud dagiti nagduduma a kinatiri a nangibunga iti ngilangil. Kadagiti napalabas a tawtawen, natinggaw ti catchphrase a ‘kung walang kurap, walang mahirap.’ Iti agdama, ‘kung walang DAP at PDAF, walang mahirap!’

Siguradokami a saan a dayta ti rason no apay nga adu ti nakurapay nga umili, no di ket ti kinasadut, ti manggundaway imbes a mangbinnat kadagiti tultulang, agdillaw di aggunay, ken dadduma pay.

Pudno a makapamisuot ti isyo a saan a panangaramat iti kuarta ti ili a para iti idudur-as ti ili ken pagnam-ayan dagiti umili. Pudno la unay a makapasugkar nga aramid ti panangibulsa ti kuarta ti ili ken panangaramat iti bukod a pagimbagan imbes a kaadduan. Pananggundaway daytan. Maibilang nga aramid nga immoral.

Ania ngarud ti umno nga aramiden? Moral recovery?

Ti bulan ti Nobiembre ti naideklara a tinawen a Filipino Values Month sipud pay idi 1992. Panangpapigsa kadagiti tagipatgen (values) a nariingan, dagiti gupit a naikalupkop iti kinaasino ti puli.]

Sakbay daytoy, naimutektekanen dagiti sosiolohista a nasken la unay a maipaayan iti sanggiran a panangpapigsa iti pundasion dagiti amin a tagipatgen tapno saan a maiyaw-awan ti sosiedad wenno aglak-am iti nakain-inaka a kasasaad. Isu ti motibo ti Moral Recovery Program ti gobierno. Nabaked unay a programa a  mangitaguyod iti kinapateg ti kultura, values ken ideals.

Dagiti tagipatgen ket kalidad ti kababalin, panagpampanunot ken tabas wenno ugali ti tao. Nasursuro dagitoy kadagiti nagannak, iti uneg ti pamilia, iti eskuelaan ken iti komunidad a pagnaedan, a kas iti panangipateg kadagiti nataengan, panagmannaranay, bayanihan, makatao, makaili ken maka-Dios.

Agserbi koma a paratignay ti tinawen a Filipino Values Month ken isaknap ti importansiana tapno dumteng ti panagbalbaliw.#