Footer

EDITORIAL: Kurang a hues, piskal: dakkel a problema ti hudisaria

Adu latta ti bakante a puesto ti hues ken piskal iti hudisaria.

Kaadduanna kadagiti bakante ti posision ti hues dagiti municipal trial courts (MTC) ken municipal circuit trial courts (MCTC).

Ngarud, kapilitan nga aggudadud dagiti hues a “mabulod” manipud kadagiti sabali nga ili wenno siudad tapno saan a mapempenan dagiti kaso a naidatag kadagitoy apektado a korte.

Ngem apay nga umad-adu dagiti bakante iti hudisaria idinto a nasurok a 1,000 ti agturpos kadagiti 75 a pagadalan iti linteg iti sapasap a pagilian iti tinawen?

Ti nababa a sueldo ti dakkel a makagapu ti panagikay dagiti abogado nga agaplikar a piskal wenno hues.

Agpayso a naingato ti sueldo dagiti hues ken piskal ngem arig di pay mangarabukob no inumen koma a pangpedped iti waw. Pudno daytoy agsipud ta nangngegmi a mismo manipud iti bibig ti maysa nga abogado a masapulanna iti dua wenno tallo a bulan laeng no adda gasatna ti masueldo ti maysa a piskal wenno hues iti makatawen.

Saan a masapul a maysaka nga abogado wenno hues tapno makitam ti serioso nga implikasion ti kaadu dagiti mabakantean a posision ti piskal ken hues iti pannakaipakat ti hustisia.

Natural a mapempenan dagiti korte kadagiti kaso. Di ngarud nakakaskasdaaw nga adda dagiti akusado a lumlumotenen iti pagbaludan ngem di pay nagbanag ti kasoda ta kas kaginad ti pagong ti panagkuti ti kasoda iti pangukoman.

Di ngarud masaaw nga adda dagiti biktima ti krimen a mangrisut ti hustisia iti bukodda nga ima gapu iti pannakaitungtungkua ti impilada a kaso iti korte.

Kastay kunada, “naitantan a hustisia, naipaidam a hustisia.”

Iti sabali a bangir, gapu ta di makapnek ti sueldo ti piskal ken hues, dakdakkel ti awis ti sulisog ken panagkunniber iti hudisaria. Kapilitan nga adda dagiti hues nga agiwayat iti “sariling sikap”.

Nupay mamatikami a kaaduanna kadagiti hues ken piskal ti disente ken napudno iti pagrebbenganda, adda dagiti nagbalin nga itta iti hudisaria – hoodlums in robes – gapu iti saan a makapnek a sueldo ken benepisio nga aw-awatenda iti panagserbida iti gobierno.

Agingga iti saan nga ipaayan ti Kongreso iti naan-anay a suporta dagiti piskal ken hues babaen iti nangatngato pay a sueldo ken benepisio tapno annongenda ti pagrebbenganda a disente, nadalus ken awanan mulit, saanto a malapdan ti panagikay dagiti law practitioners ken kabarbaro a law graduates a sumrek iti hudisaria.

Kabayatanna, pumuspuskol dagiti maipempen a kaso kadagiti korte.

Urayen kadi pay ti Kongreso nga agbalin daytoy a dakkel a parikut nga ad-adda laeng a mangpadagsen iti nadagsen la ngaruden ken nakapimpiman a kasasaad ti sistema ti hustisia iti pagilian?