Footer

EDITORIAL: Lapse in judgment

Napagtitinongan dagiti pito nga obispo katoliko a naisawsaw ti naganda nga immawat iti pondo manipud iti Philippine Charity Sweepstakes Office nga inggatangda iti lugan  nga isublida dagitoy iti nasao nga opisina.

Nupay inyunay-unay dagiti obispo nga inaramatda dagiti nasao a lugan para iti programa ti kaasi iti bukodda a dioses, imbatadda babaen ti statement a binasa ni Cotabato Archbishop Orlando Quevedo nga isublida dagiti lugan uray iti baet nga awan ti malisia iti panangawatda kadagiti nadakamat a lugan.

Saantayon a dakamaten ti nagan dagiti obispo nga immawat iti lugan wenno pundo manipud iti PCSO nga inggatangda iti lugan. Dakamatentayo laeng a saan a Pajero ti inawatda a lugan, kas naipadpadamag.

Dimmawat dagiti obispo iti padispensa gapu iti panangawatda kadagiti nasao a lugan idinto a kiniddawda nga iti panangipeksada iti ladingitda, maited koma kadakuada ti nabannayat a pangngeddeng ken iti nainget a panangtunton iti sibubukel a kinapudno iti likudan ti kontrobersia.

Impatalged dagiti obispo a maseknan a sisasaganada a mangawat iti responsibilidad gapu iti inaramidda ken mangsango iti aniaman a pagdapagan ti inaramidda no mapaneknekan a maikaniwas, maanomalia ken saan a konstitusional daytoy.

Makunami met: ala, gapu ta inako dagiti obispo a nagbiddutda iti pangngeddengda (lapse in judgment) ken insublida dagiti inawatda a lugan, rikpan koman ti Senado ti hearing mainaig iti daytoy agsipud ta dakkel a pakaibabainan ti nagtungpalanna iti biang dagiti sumagmamano a nangato a turayen ti Simbaan Katoliko.  Isentroda laengen ti panagpalutpotda kadagiti sabali nga anomalia a mapapati a nakaaramatan dagiti pondo ti PCSO para iti kabukbukodan a pagimbagan ken interes dagiti sumagmamano nga agtuturay ken politiko.

Saantayo a mapabasol dagiti obispo no inawatda dagiti lugan nga awan ti malisia. Ngem sakbay nga inawatda, kinitada koma no maiparbeng nga awatenda idinto nga ammoda a nagtaud ti pondo manipud iti lotto a maibilang a maysa a numbers game wenno game of chance a konkontraen ti simbaan gapu ta makailuod daytoy iti moral a panagbiag dagiti umili.

Agbalin koma daytoy a dakkel a leksion kadagiti obispo ken papadi ti simbaan a sakbay nga umawatda iti aniaman a lugan, pabor wenno regalo manipud kadagiti politiko ken opisina ti gobierno a kas iti PCSO, Pagcor ken dadduma pay a pasugalan, amirisenda a nalaing no maikanatad wenno maiparbeng kadagiti sursuro ken polisia ti Simbaan.#