EDITORIAL : Maiyannatup kadi?

Itay nabiit, kalpasan a pinirmaan ni Executive Secretary Pacquito Ochoa Jr. ti commissioned papers ni Sarangani Congressman Manny Pacquiaoa a pannakaipromotna iti ranggo kas lieutenant colonel iti Philippine Army Reservist.

Mabalin nga awan koma ti mangeg a balikas no maysa laeng a ranggo ti linayawna. Ngem iti daytoy a pannakaipromot ni Manny Pacquiao, lima a ranggo ti linaktawna: chief master sergeant, second lieutenant, first lieutenant, captain ken major.

Iti daytoy a pasamak, agsaludonton kenkuana dagiti nababbaba nga opisial a nabayagen iti serbisio ken no mano a tawen ti linasatda sakbay a magun-odda ti promosionda a pakaibilangan ni Major Harold Cabunoc, spokesperson ti Philippine Army.

“Kas nabutosan nga opisial ken gapu iti dayaw nga inted ni Pacman iti sibubukel a pagilian, ken nangruna iti Army, kasla saan a makaanay a maysa laeng a senior master sergeant,” panangikalintegan ni Cabunoc.

Kinuna ni Cabunoc a binigbig ti Army ti honorary doctorate degree nga inted ti South Western University ken ni Pacquiao kas rason tapno maikanatad a maipromot ni Pacman wenno People’s Champ.

Ngem kas sagudayen ti RA 7077, maikkan laeng ti maysa nga elected official iti ranggo ti maysa nga opisial iti reservist force ti Armed Forces of the Philippines no nakaturpos daytoy iti college degree.

Kasta met a kinuna ni Dr. Clarita Carlos, maysa nga eksperto iti depensa ken seguridad, a saan a makaanay ti maysa nga honorary degree ken ti kinakampeon ti Pacquiao tapno maipromot a commissioned officer ti PA, ken ti karona, limmagto iti lima a ranggo.

Ayonanmi ni Dr. Carlos iti panagkunana a ti problematayo ket sobra a killo ti sense of proportiontayo. Agpayso, dakkel a dayaw ti inted ti panagbalin ni Pacquiao a kampeon ti boksing iti sangalubongan ngem dayta kadi lattan ti kangrunaan a pagibasaran? Agtungpal laeng daytoy iti nababa a morale iti rank and file, nangruna dagiti opisial a no mano a tawen a nangiburay iti serbisioda tapno magtengda ti agdama a ranggoda.

Ken masaludsod: namak payen no adda gubat? Kasano nga idauluan ti maysa a Pacquiao nga awan ti ammona iti warfare ti maysa a batallion dagiti soldado?

Ti rigatna ken ni Pacquiao, awatenna amin a maitanggaya kenkuana a pammadayaw, uray no mabalin met koma a dina awaten gapu laeng iti delikadesa a saan a maitutop nga awatenna ti saad a lima a ranggo ti layawenna.#