EDITORIAL: Makaupay ti nababa a conviction rate dagiti makasuan a drug personality

Iti interbiona iti media, kinuna ni PDEA Director General Jose Gutierrez, Jr., a dakkel a pakaupayanda iti pannakirupakda iti droga ti nababa a conviction rate dagiti drug personality nga isaklanganda iti kaso iti korte.

Adda pamkuatan ni Gutierrez nga agsarita iti kasta agsipud ta 52% kadagiti kaso nga impilada ti naibasura wenno maikontra kadakuada a drug enforcers.

Kinapudnona, daytoy met ti maysa a pagsansanamtekan dagiti opisial ti Philippine National Police gapu iti masansan a pannakawaswas dagiti kaso nga insaklangda iti korte maikontra kadagiti matiliwda nga aglaklako iti droga ken dagiti maipalab-ogda kadagiti buy bust operations nga isayangkatda.

Maysa nga opisial ti nagkuna iti maysa nga interbio a dakkel unay a pagsaksakitan ti nakemna ti pannakadismis wenno pannakawaswas dagiti kaso nga isaklangda maikontra kadagiti drug pushers iti baet a nagpuonanda iti sakripisio ken inyappanda iti peggad ti biagda tapno laeng matiliw dagitoy ken malapdan ti illegal nga aktibidadda.

Ngem maysa a hues ti nagkuna a no adda man mababalaw iti nababa a conviction rate dagiti masaklangan iti kaso ti droga, dagiti polis met laeng.

Umuna, adda dagiti “abut” ti kaso a lumsotan dagiti nasak-langan. Iti sabali a pannao, saan nga “air-tight” agsipud ta kaadduanna a police stations ket awananda iti makabael a polis nga agisagana kadagiti pammaneknek ken dokumento ket iti pay laeng opisina ti prosecutor, mabalinen a saan nga agdur-as ti kaso gapu kadagiti pagkamtudanda iti linteg.

Maikadua, no bilang man agdur-as ken maipila ti kaso iti korte, adu dagiti gundaway a saan nga agparang dagiti testigo a polis wenno ahente iti pannakabista ti kaso agsipud iti kaadu ti sabali a pagrebbenganda. Dakkel a panagliway daytoy dagiti opisial a puon ti pakadismisan ti kaso.

Ania ngarud, iti pannaka-waswas ti kasona, nawaya manen ti drug personality a mangpataray iti illegal a negosiona agingga iti mati-liwanto manen dagiti pan-nakabagi ti linteg.

Ania ngarud ti kasayaatan nga aramiden ti kapolisan tapno mapadakkelna ti conviction rate dagiti matiliwna a drug personality?

Rumbeng nga ibaon ti provincial police office dagiti ubbing ken makabael a polis nga agbasa, saan laeng iti panagimbestiga no di pay maipapan iti linteg tapno saan nga agkamtud dagiti isaklangda a kaso iti korte.

Panawen metten nga amin a provincial police offices ken dadduma pay a law enforcment agencies ket maaddaanda iti bukod a dekalibre nga abogado a mangisagana ken mangsurot kadagiti kaso ti droga nga isaklang ti opisinada.#