EDITORIAL: Malasado a Naidasar?

Itay Mayo 9, maysa a dakkel a panagprotesta maikontra iti K to 12 program ti naangay iti Liwasang Bonifacio tapno maipasagepsep kadagiti agftuturay iti DepEd, nangruna ken ni Presidente Benigno Aquino ken dagiti justices iti Korte Suprema a saan pay a nakasagana ti pagilian iti daytoy a programa.

Sakbayna, nangipila da Senador Antonio Trillanes, kaduana da Gary Alejano ken Francis Ashley Acedillo, agpada a Magdalo Partylist representatives, iti petision iti Korte Suprema a nangdawatanda iti pannakasuspenso iti R.A. 10533 wenno K to 12 Law agsipud ta awan ti naangay a konsultasion ken partisipasion iti amin a tukad bayat ti pannakaputar ti nasao a linteg.

Segun ken ni Trillanes, kasapulan a masuspenso ti linteg tapno maikkan iti naan-anay ken komprehensibo a panagadal iti epekto iti pannakaiyimplementarna kadagiti marigrigat a sektor iti sosiedad a pakaibilangan dagiti nagannak, mangisursuro ken dagiti agtutubo.

Ni laeng Trillanes ti saan a nangbutos idi iti K to 12 law. Maysa nga epekto ti K to 12 law ti sapasap a pannakaikkat dagiti mangisursuro ken non-academic personnel dagiti pagadalan, nangruna kadagiti agisursuro iti kolehio agsipud ta awan ti incoming college freshmen iti las-ud ti dua a tawen kas resulta iti pannakayimplementar ti nasao a programa.

Wen, iti papel, napintas a programa ti K to 12 agsipud ta manamnama a sumayaat ti kalidad ti edukasion gapu ta umatiddog ti tawen a panagbasa dagiti ubbing iti elementaria ken sekundaria ket nabilbileg ti kalasagda a bumirok iti panggedan tapno dumur-as ti panagbiagda. Nasakit nga annugoten ngem no idilig dagiti nagturpos iti sekundaria wenno kolehio ita kadagiti kapatadanda iti napalabas, saan a makakikit dagiti graduado ita kadagiti nagturpos idi. Maitudo a kangrunaan a rason ti nababa a kalidad ti edukasion iti agdama. Agpapanaw ngamin dagiti makabael a mangisursuro agsipud ta nababa ti sueldo, malaksid nga adu unay dagiti ibaklayda nga annongen, malaksid iti panagisuroda.

Ayonanmi ti singasing ni Trillanes ken kakaduana a masuspenso pay la ti K to 12 program agingga a maisagana a nasayaat ti implementasionna, partikular dagiti problema a masirmata a mapasamak, kas iti massive termination dagiti mangisuro iti umuna a tukad iti kolehio no maituloy ti implementasion daytoy a programa.#