EDITORIAL: Mandatory tip, padagsen iti riding public

Naawis ti imatangmi itay nabiit ti maysa a damag a nagkunaan ti maysa a nangato nga opisial ti transportasion a mangrugi iti mabiit ti panagkolekta dagiti taxi drivers iti kanayonan a P15 a mandatory tip iti panangitulodda kadagiti pasaheroda. Sabali laeng ti flag down rate apaman a limmugan ti pasahero iti taksi.

Immun-una iti daytoy, nangidatag ti Samahan ng Taxi of Cordillera Administrative Region ken dadduma pay a taxi operators iti petision iti regional board para iti madagdagus a panangaprobarna iti kiddawda a mandatory tip maigapu kano iti dandani linawas a panagpangato ti presio ti gasolina.

Ala, saantayo a mababalaw dagiti taxi operators nga agkiddaw iti nangatngato a fare rate agsipud ta agpayso met a dakkel ti ngimmatuan ti presio ti gasolina gapu iti mapaspasamak a riribuk iti Nagtengnga a Daya. Iti biangmi, kasapulanen a maingato ti agdama a flag down rate a P25 ken kanayonan a P1.50 para kadagiti sumarsaruno a kilometro. Ngem makunami nga uray ti P40 flag down rate kas kiniddaw dagiti taxi operators ket nadagsen nga ibaklay ti riding public. Nalabes unayen no adda pay mainayon a P15 mandatory tip para kadagiti taxi drivers!

Masiripmi a maysa a namkuatan dagiti taxi drivers a nagkiddaw iti mandatory tip ti bumasbassit a matgedanda agsipud iti kinangina ti presio ti gasolina. Ngem karigat ti tiempo ita. Laglagipen koma dagiti taxi drivers a saan a babaknang amin dagiti agluglugan iti taksi. Kaadduanna kadagiti agluglugan ti taksi dagiti middle income nga umili nga adda nasken a papananda ken agkamkamat iti oras, banag a saanda a magun-od no agluganda pay laeng iti dyip a sa la agtaray no napunnon ti lugan.

Mabalin a saan a makita dagiti taxi drivers a no mapadagsenan unay dagiti agluglugan iti taksi gapu iti mandatory tip ken nangato a flag down rate, aglugandanto laengen iti dyip wenno bus ket agbalagbagto met laeng kadakuada ti bumasbassit a pasaheroda nga agtungpal iti basbassit a matgedanda.

Apay ketdin a mandatory nga ikkam iti tip ti maysa a taxi driver ket pagrebbengannaka nga itulod iti papanam no agluganka iti taksina? Adda iti pasahero ti diskresion no ikkanna iti tip ti drayber aglalo no nadayaw daytoy ken nasayaat ti serbisiona ngem saan a kas panagtungpal iti pammilin.

Iti met biang ti DOTC, inadalna kadi a nasayaat ti ibunga daytoy a pannakaipakat ti mandatory tip kadagiti taxi drivers? No di pay kayat nga ipakat dagiti dadakkel a pagilian ti mandatory tip, ditoy ketdin pagiliantayo ti pakaipakatanna?

Saankami a masdaaw no  mabato ti DOTC kadagiti pammabalaw ken kritisismo iti daytoy a panangipalubosna ti mandatory tip kadagiti taxi drivers.#