EDITORIAL: Masapada a maisagana iti panagserbi

Kas paset ti selebrasion ti Children’s Month iti Oktubre, kas naipakadawyanen, dagiti agbasbasa nga ubbing ti nangiggem iti turay ti Vigan City iti sumagmamano nga aldaw.

Itay Oktubre 30, dagiti estudiante iti sekundaria ti nagsaad nga opisial ti gobierno ti siudad ti Vigan ket iti daytoy nga aldaw, isuda ti nangimaton iti operasion ti gobierno ti siudad.

Iti sangguniang panlungsod, nagsession dagiti ubbing nga opisial tapno tratarenda dagiti gakat ken resolusion babaen ti panangtarabay kadakuada dagiti counterpartda nga opisial.

Kinapudnona, saan nga orihinal daytoy a gannuat ti city government. Malagipmi nga idi agbasbasakami pay iti elementaria, iti scouting month, naikkankami iti gundaway a mangiggem iti pagrebbengan dagiti opisial ti munisipalidad ken dagiti polis. Napadasanmi idi ti nagtrapiko iti kalsada babaen ti tulong dagiti traffic police. Gapu iti daytoy a kapadasanmi, imetmi agingga ita ti respeto ken panagraem kadagiti traffic police, ken iti panangsurotmi kadagiti paglintegan ti trapiko.

Nasayaat daytoy tinawen a gannuat ti gobierno ti siudad a panangipaiggem iti pagrebbengan dagiti opisial kadagiti ubbing. Babaen ti kastoy a wagas, mapadasan dagiti ubbing no kasano ti pannakapataray iti maysa a gobierno tapno naannayas ti operasionna ken maitedna ti napintas a serbisio kadagiti umili.

Kas makunkuna a sadiri ken namnama ti masakbayan, dagitoy nga ubbing ti agbalinto a lider ken opisial iti siudad a mangiggemto iti rienda ti turay ken agserbi kadagiti nadumaduma nga opisina ti gobierno. Ita ta nasapa pay, rumbeng laeng nga isagana dagitoy nga ubbing nga agbalin a dadaulo wenno agtuturay ken mangmangged iti wagas nga agbalindanto a pagwadan, nasin-aw ken awanan mulit ti panagserbidanton kadagiti umili.

Bigat-kasangaldaw, ipasublattayo kadagitoy nga ubbing ti pannakaipataray ti gobierno ken dagiti opisina. Kayarigantayo a nataengan dagiti nagkauna a pioneer a mangraat iti nasamek a dalan tapno inton dumteng ti panawen, nasayaatto ti dalan a daliasaten dagiti ubbing para iti nadurdur-as a panagbiag.

Iti naganus a panunot dagiti ubbing ita, kayarigan dagiti public servant ti maysa nga idolo a tangtangaden ken raemenda. Dakkel ti inpluensia dagiti nataengan nga agtuturay kadagiti ubbing. No ania ti mapaliiw ken makitada nga aramid dagiti nataengan, dagitoy ti aramiden ken ipakatda no addadan iti masnop a tawen. Kastay kunada, saan nga agbunga iti mabolo iti santol. No ania ti itukitmo iti panunot ti ubing, daytoyto ti agbukar kenkuana iti masakbayan.

Ala, napintas daytoy a gannuat ti gobierno ti siudad a panangited iti gundaway kadagiti ubbing a mangpataray iti siudad uray iti apagkanito laeng. Ad-adu koma pay a lokal a gobierno ti mangsurot ken mangtulad iti daytoy ulidan a gannuat dagiti agtuturay ti Vigan City. Isaganatayo dagiti ubbing iti pagwadan a wagas tapno agbalinda a nasayaat nga umili ken pagwadan nga agtuturay iti masakbayan.#