EDITORIAL: Maymaysa ti puli a a nagtaudantayo

Itay nabiit, naireport a sumagmamano a soldado ti turay ti nagudas iti nasao a pannambang nga insayangkat dagiti kameng ti NPA. No patien ti report, saanen nga impalubos ti militar a makita pay ti pamilia ti rupa ti maysa a natay a soldado gapu ta mapapati a dinerder dagiti kabusor ti turay iti bala ken bolo iti baet a bangkayen daytoy.

Iti surat ti spokesperson ti NPA-Abra a naiwaras kadagiti nadumaduma a kameng ti media, kinondenarna ti insinuasion nga inaramidda daytoy a kinadamsak.

Kinuna ti NPA a nainget a sursurotenda ti internasional a konbension ken dagiti linteg ti gubat ken nainget nga iyim-implementarda ti Comprehensive Agreement on Human Rights and International Humanitarian Laws a pinirmaan nga agpadpada ti gobierno ti Republika ti Pilipinas ken ti National Democratic Front.

Pinabasol pay ti NPA-Abra ti AFP ken PNP nga isuda ti mangderder iti bagi dagiti nagudas nga NPA a gerilia ken pumatay kadagiti nakemmeg wenno nasugatanĀ  ken saandan a kabaelan ti makirupak pay.

Iti kallabes, kastoy met laeng ti pammabasol ti militar a panagabuso dagiti kabusor ti turay.

Ala, saantayo a makirinnikiar no agpayso wenno saan dagiti pammabasol ti panagabuso ti tunggal bangir. Ti laeng maibinglaymi, iti aniaman a panagdinnupir dagiti ideolohia, adda latta dagiti maiwalin iti dalan. Adda dagiti maisakripisio.

Ngem makunami: agpapadatayo a Filipino. Apay a datayo ti agsisinnida? Apay a mabingbingaytayo idinto a maymaysa ti puli a nagtaudantayo, maymaysa ti dara nga agtartaray iti urattayo?

Saantayo kadin a makapagsisinnango iti maymaysa a lamisaan tapno mapagpapatangantayo dagiti rikkier iti nagbaetantayo? Nagbalin kadin a kasla bantay ti kadakkel ti nagbaetantayo tapno saantayo a makapagsisinnabat nga agturong iti maymaysa a direksion?

Iti napalabas a tallupulo a tawen, gapu iti saantayo a panagkikinnaawatan, adu dagiti nalnaawan iti keltaang ti rabii, adu dagiti naitanem nga awanan iti padeppa, adu dagiti nagpukaw iti kasipngetan. Kastoy kadi lattan ti panagbiagtayo – agkakabsat ngem agsisinnida?

Ipasulitayo koman dagiti paltog ket arakupentayo ti kappia a nagbalin a ganggannaet iti nagbaetantayo. Iti laeng kaadda iti kappia iti kaunggantayo a rumukbos ti namnama a maital-o pay ti panagbiagtayo a kas Filipino ken agkakabsat, aniaman ti kasasaadtayo iti biag, nabaknang wenno napanglaw, masirib wenno nengneng, kristianotayo man wenno Muslim.

Agtaltalinaed latta kadin a tagtagainep a ditayo magaw-at?#