EDITORIAL: Maysa a Kinabaruyuboy

Saan a nasayaat a denggen a nakagasto ti entourage ni Presidente Arroyo iti $20,000 ken $15,000 iti dua a pannangan bayat ti ibibisitana iti Estados Unidos.

Iti agdama a foreign exchange rate a nakurang a P48 ti kada doliar, aganay a P2 milion ti ginastos ti entourage ti Presidente iti daytoy dua laeng a pannangan.

Maysa a kaaliado ti Presidente ti nangikalintegan a rumbeng laeng a mangan ti Presidente ken ti bunggoyna iti maysa a disente a panganan kas maikanatad iti posisionna ken dagiti kakaduana.

Sabali pay a tuta ti Presidente ti nangikalintegan a saan a daytoy ti naggasto iti pannangan no di maysa a kongresista.

Ala wen, rumbeng laeng a mangan ti Presidente ken ti bunggoyna iti maysa a disente a panganan. Ngem masaludsod: nabisinan la kadin unay ti entourage ta immabut iti aganay P2 milion ti nagastoda iti dua a pannangan?

Ala wen, saan a naggasto ti Presidente iti uray maysa a sentimo (no agpayso), saan latta a nasayaat a damag dayta kadagiti umili, nangruna dagiti sangkabirokan-sangkaapuyan wenno dagiti dida ammo ti pakateggedanda iti igatangda para iti pangngaldaw wenno pangrabiida.

Adtoy ti maysa a kailian, agmalmalem iti kainaran tapno makategged iti igatangna iti sangakilo a bagas ken sardinas wenno iti karinderia idinto nga adda dagiti nangangato a turayen ti pagilian a pakaibilangan ti Presidente nga aggasto iti aganay maysa a milion iti maysa a pannangan laeng?

Maysa daytoy a kinabarayuboy a saan a maikanatad a maikapet iti agtuturay iti maysa a pagilian nga adu nga umili ti kammet ti kuko ti kinakurapay.

Maysa daytoy a kinapasindayag a di rumbeng a maiyappeng kadagiti agtuturay iti maysa a third word country a kas iti pagiliantayo.

Ita, segun iti Commission on Audit, limbes iti nailatang a budget ti nagasto ti Presidente iti naudi a panagbiahena iti sabali a pagilian Ngem nakakaskasdaaw kadi dayta iti sanguanan ti mapaliiw a kinabarayuboy ti grupo ngem ti ginastoda ket ti kuarta ti Juan de la Cruz?

Rumbeng laeng a maputed daytoy a kinabarayuboy ken kinadang-as iti tunggal panagbiahe ti Presidente. Maaramidna daytoy babaen ti pananglimitana dagiti sumurot kenkuana a dagiti laeng consultant wenno mammagbaga a kasapulanna iti dayta a panagbiahena ti isurotna a saan ketdi a kas paborna kadagiti kaaliadona a mangisaksakit kenkuana ken madadaan a mangikalawikiw iti ipusda no kasdiay a sitsitanna ida.#