EDITORIAL: Merry Christmas!

Dimteng manen ti naisangsangayan nga aldaw, ti panangselebrar iti pannakaiyanak  ti Mesias. Selebrasion a manggutigot iti kaipapanan ken kinapateg daytoy nga aldaw iti biag tunggal Kristiano. Itoy a pananglagip ken panangselebrar iti pannakaipasngayna, karamantayo koma met a maipasngay babaen ti nasged ken naam-amnut a pammati ken panirigan, panamati iti Mesias a naipasngay sadiay nanumo a kulluong.

Apay nga iti kulluong dagiti ayup a saan ket nga iti narangya a pagtaengan wenno iti palasio ti nakaiyanakan ti Mesias? Wen, ta ipasimudaagna ti kinapudno a ti kinapakumbaba ket galad a rumbeng a taginayonen. Ta daytoy ti sarikedked ken pakaiyadayoan iti kinapalangguad ken panangbagtin nga agnanayon iti bukod a bangkito.

Naisangsangayan a selebrasion-sangalubongan ta nabugasan iti ayat, pinnateg ken panangilala. Ayat lalo kadagiti amin a Kristiano a mangselebrar iti pannakaipasngay ti Mannakabalin.  Panangipateg iti tunggal maysa, saan laeng a dagiti pada a Kristiano no di pay ket panangipateg kadagiti saan a kapammati.

Kasta metten nga ipasngaytayo, pabaruentayo, pasingkedan koma (pay) dagiti galad ken kababalin a manangisagut iti aniaman a wagas a pagimbagan. Panangisagut a kas iti panangisagut ti Namarsua iti Anakna iti tao; nga imbaonna iditoy daga tapno maaddaantayo iti pagsarmingan iti biag ken pakaisalakanan.

Iti intay panagsisinnagut  ken panagkikinnablaaw iti Merry Christmas, dumteng ken mariknatayo ti nataginayon a kaipapanan ti kappia, saan laeng nga itoy a kaaldawan iti paskua no di ket amin nga aldaw. Pagtalinaeden ngarud ti paskua iti amin nga aldaw tapno agtalinaed ti kappia ken ragsak iti sangalubongan.

Saantayo met a liplipatan nga idanon ti kablaaw ken saguttayo lalona kadagiti awanan, dagiti biktima iti naglabas a kalamidad. Kasapulanda ti pakariknaanda iti mangipatpateg ken mangilala kadakuada; iti mangiparikna iti nasged a panagayat ni Jesucristo.

Saan koma a lumamiis dagiti naisangsangayan a galad ken tagipatgen a maanninaw ken anag ti biag no apay a tinawen nga intay selselebraran. Maruk-atan koma ti isip ken pusotayo kadagiti pakaidageman nga awanan kinaserbi ken pakaitebbagan basol.

Itoy a paskua, sangsangkamaysatayo a mangablaaw iti amin, ken sipupuso nga agkuna: MERRY CHRISTMAS kadakayo amin!