EDITORIAL: Milagro no lumsot ti gakat a kontra-dinastia

Agngarngariet la ketdi ti rikna ni Senador Miriam Defensor-Santiago no apay a maiwalwalin iti Senado ti gakatna a kontra dinastia. Ngem uray mano a Senador Defensor-Santiago ti agdepdeppa, purawton ti wak no lumsot iti Senado ti gakat a kontra dinastia. Wenno agpiangpiangton ti langit a kunada no adda dumanon ken ni Presidente Benigno Aquino III a landmark a dokumento a pirmaanna tapno agbalin a linteg ti kontra dinastia.

Ammomi nga iti kaunggan ni Senador Miriam Defensor -Santiago, ammona  no apay a saan nga agkuti ti gakatna a kontra dinastia. Naimbag pay diay pag-ong ta uray kasano kabuntogna nga aggaraw, makitam nga adda magudilanna nupay maimbiernaka iti kawatiwat ti panawen tapno makagteng iti papananna.

Uray di pay nagturpos iti elementaria, ammona no apay a saan a maitaltalek ti gakat maikontra iti dinastia. Ammona pay a sapasap daytoyen a sakit ti politika a nakaunegen ken nailasagen ket saan a kasta kalaka nga iwagsak wenno ikugtar lattan dagiti politiko agsipud ta daytoy ti nangtaptapaya kadakuada tapno ad-adda pay a mapabilegda ti turayda, maital-o ti naganda ken maikabilda iti  pedestal a kayariganda ti kasla didiosen a tangtangaden ken pagrukbaban dagiti tattao.

Ipalawlawmo laeng ti imatangmo iti sibubukel a pagilian ket makitam a namirit dagiti pagannongan a maymaysa wenno dudua laeng nga apeliedo ti mangig-iggem. Manipud iti presidente a kangatuan a pagannongan agingga iti barangay kagawad a kababaan, mabilbilang iti ramay dagiti politiko a saan a kapamilia wenno kapuso wenno kasinsinnukit ti maymaysa a puon wenno tuodan nga apeliedo.

Saantayon a masdaaw no apay a saan a kayat nga ibbatan dagiti maimpluensia a pamilia ti kapetda iti politika. Saantayon a saludsoden pay no apay a pagpipinnatayan, pagrarangasan, pagpipinnaltakan iti pitak wenno ania ditan a kinadamsak ti politika kadagiti sumangbay nga eleksion. Dakamatem laeng ti PDAF, DAF, pork barrel, CDF, wenno ania ditan a balikas a kaarngida, ket umapayen iti panunotmo dagiti agkatkatay ken agsansanapsap a lobo a kalanglanga dagiti maresrespeto ken madaydayaw a politiko.

Wen, purawton ti wak no makauyas ti gakat kontra ti dinastia agingga iti maungpot ti administrasion ni Presidente Benigno Aquino III. Nakarkaro pay itan ta iti kinamoderno ti teknolohia, maysa laengen a pindot ket magun-oden ti tartarigagayan a pabor.

Agingga iti awan ti naipanurok a political will dagiti mangig-iggem iti rienda ti turay, pamrayan laengen ni Senador Miriam Defensor-Santiago ken dagiti umili ti agamusay iti kaawan ti baelda a mangibual kadagiti tradisional a politiko a saan met nga agserbi ti kangrunaan a gagemda iti turay no di tapno pabilgenda pay ti kawarda a mangputipot iti tengnged dagiti tattao.#