EDITORIAL : Nakurang a sirmata

Nagsagrap iti layus dagiti sumagmamano a probinsia iti Luzon a pakairamanan ti ti Pampanga, Bulacan, Tarlac, ken Nueva Ecija gapu iti pannakailukat dagiti kangrunaan a penned iti Luzon tapno adda kuno paglugaran ti danum nga isangbay dagiti agpangpangta a bagyo ditoy pagilian.

Dagitoy dagiti dam a naipasdek:  ti Ipo ken Angat iti Norzagaray, Bulacan, ti Bustos  iti Bustos, Bulacan, ti San Roque iti Pangasinan, ti Binga iti Itogon, Benguet, ti Magat iti Isabela, ken ti Ambuklao iti Benguet.

Inkalintegan dagiti mangimaton kadagiti dam a kaaduanna a naipasdek iti Central Luzon nga inkapilitan a nagpabulosda iti danum agsipud ta dandanin agluppias ti danum a kargada ken tapno adda paglugaran ti danum nga isangbay dagiti sumungad a bagyo.

No saanda nga agibulos iti danum, dakdakkel kano a didigra ti mabalin a mapasamak no marba dagiti dam ket agdadarison ti napigsa ken napegges a bagi ti danum nga agpababa a sigurado a  mangduprak kadagiti kabalbalayan ken mangiyanud kadagiti madalapusna.

Kinuna ti maysa nga opisial ti World Wildlife Fund a saan a nainsiriban ti panangibulos ti danum ti dam kadagiti karayan.

Ta apay a kasapulan nga ibulos dagiti danum dagitoy a dam a maipaturong kadagiti karayan a lumasat kadagiti nadumaduma nga ili ken probinsia? Uray no saan a nakaadal ni Pedro, ammona a no kastoy nga agdinakkel ti karayan, surotenna dagiti nababbaba a lugar agingga a tumipon manen iti sabali a karayan wenno bagi ti danum.

Iti nalawlawag a pannao, malayus dagiti low-lying areas a pakadadaelan dagiti sanikua ken pakaibuisan dagiti biag, malaksid laeng iti ipaayna a panagrigat ti panagbiag dagiti madalapus nga umili.

Ngem posible a saan a nasirmata daytoy dagiti mamasirib nga agtuturaytayo. Posible met a nasirmatada ngem nagimbubulsekanda ti didigra nga ipaayna kadagiti umili.

Ti ketdi koma aramiden ti gobierno ti mangipasdek kadagiti kanayonan a floodways ken retention basis ket mangipasdek kadagiti forest recharge areas, kinuna pay ti opisial ti World Wildlife Fund.

Umanamongkami iti dayta nga imbalikasna. Ket daytoy koma ti ikkan ti gobierno iti naan-anay nga imatang no agtaltalna ti panawen. Agpaay koma a leksionna ti pannakalayus dagiti probinsia gapu iti pannakaibulos dagiti danum kadagiti dam.#