EDITORIAL: Nalidem ti Ibunga iti Panangtallikud ti Sosial a Responsibilidad

Naikompromiso ti sosial a responsibilidad kadagiti umili iti iseserrek ti gobierno iti kuestionable a transaksion a kaipapananna ti panangtallikud jti moral ken sosial a karbengan a rumbeng koma a maipaay  nangruna kadagiti nakurapay, ti panangipasidong ti public-private partnership (PPP) kadagiti dadakkel a pampubliko nga ospital a katinnulong koma ti health care program ti gobierno. Ngem ti agdadata a kinapudno, awan ti pribado a kompania a dina kitaen a nalaing ti dakkel a maganarna tapno masubbotna ti puonanna ken lumiksab iti dakkel iti sinerrekna a negosio; iti daytoy a punto, ti PPP ket isu met laeng ti privatization.

Kakaasi ditoy dagiti umili kangrunaanna dagiti marigrigat ta didanton maipaayan iti serbisio a kapkapnekanda no di man libre a kas reponsibilidad ti gobierno kadagiti umilina. Saan laeng a dagiti nakurapay nga umili a mapaidaman iti serbisio salun-at ti addaan iti dakkel a parikut itoy a kuestionable a transaksion no di ket uray dagiti rinibribu a health workers, ta siempre, agngangabit a maawananda iti trabaho. Ngamin ta pilien met ti pribado a kompania dagiti persona a talkenna ket no dina aramiden dayta a banag agngangabit met nga agkalaegan ken nabuntog nga aggunay ti investment no di man isu ti marpuog wenno malugi. Tapno maliklikan dayta a senario iti investment, ti kinatalged a pagtaktakderan ket kangrunaan nga iposision sakbay ti amin.

Manginagantayo iti sumagmamano nga ospital a maipasidong iti PPP: Philippine Orthopedic Center, Research Institute for Tropical Medicine, San Lazaro Hospital, Dr. Jose Fabella Memorial Medical Center, and Jose R. Reyes Memorial Centers. Iti Cordillera ken dagiti probinsia iti Ilocos ken sumagmamano a paset iti makintengnga a Luzon, ti Baguio General Hospital and Medical Center ken dadduma a government hospital a mangap-appupo kadagiti marigrigat. Ngem iti pannakaipasidong dagitoy nga ospital iti PPP, maawan kaipapanan ti public health care program.

Iti petsa 6-12 daytoy a bulan ti Agosto ti sangkapagilian a panangselebrar ti National Hospital Week babaen iti Presidential Proclamation No. 181 a napirmaan idi 1993, a kas suporta iti  Section 5 Article 11 ti konstitusion.

Nalidem ti masakbayan ti pampubliko a programa ti salun-at no tallikudan ti sosial a responsibilidad.#