EDITORIAL: Nalunes ti Siudad dagiti Sabong

Ti pannakaisaruag ti managimbubukode a panggep ken interes  ti rason ken gapuna no apay a naluneslunes ti Jambangan wenno Siudad dagiti Sabong—ti Ciudad de Zamboanga, kaabagatanan a paset ti pagilian nga addaan iti populasion a 807,129 kas maibatay iti census idi 2010, ti maikanem a siudad a kaaduan iti agindeg.

Kadagitoy a talugading ti siudad a nagbalin a napateg nga strategic position iti maysa nga armado a dangadang, malaksid ti kalakana a mangliklik iti pakaisebbaan iti kanito a dumteng ti pannakapaay ti panggep. Namin-adun daytoy a napasamak, kas mabasa iti historia ti siudad iti ima dagiti lawless Moros.

Dagiti lawless MNLF forces a nangisaknap manen iti di mailadawan a riribuk ket Maibilang nga aramid dagiti kabaruanan a pirata wenno dagiti pirata iti agdama a panawen  ti panangisaknap dagiti lawless MNLF forces iti riribuk iti Zamboanga gapu iti saan a makatao nga aramidda. Para laeng iti bukodda nga interes ti aksionda, saan a para iti sapasap, banag a saan nga ayonan ti sibilisado a gimong. Linunesda manen ti Siudad dagiti Sabong.

Iti katulagan-kappia idi 1996 ket panangipaima kadagiti MNLF ti responsibilidad a mangituray iti agwaywayas a sosiedad a tarabayen met la ti gobierno. Isu a nabuangay ti ARMM. Ngem ania kadi ti resulta dayta a katulagan ti kappia? Saan a makapnek ti resultana. Saan a narangpaya ti inarapaap ti katulagan-kappia. Para laeng iti kabukbukodanda a rason ken interes ti inaramidda. Limmamiis ti kaadduan nga umili dita ta ammoda a di makatulong dayta para iti arapaapda met a naprogreso a lugar. Isu a napaay ti panggep ti katulagan-kappia idi 1996.

Insaruagda koma ti nainkappiaan a solusion no apay a napaay ti prebilihio, a naannayas a naipaima kadakuada a mangbuangay iti nawaya ken natalged a rehion. Ngem naabuso met dayta a prebilihio. Sa ita, agsublida manen iti wagas a nariribuk a gimong?

Nupay nagsagaba iti nakana, nakananama iti daras nga ibabangonna ta naikawes kenkuana dayta a kababalin, a kas iti makaagas a mula a sambon a naruay iti lugar ken nakaalaan ti naganna a Samboangan, nga idi agangay nagbalin a Zamboanga. Babaen iti tulong ti gobierno ken dagiti dakkel ti panagpuspusona a tattao, bumangon, mangabaruanan nga agsampaga tapno ipakitana manen ti pusaksakna a kas Siudad Dagiti Sabong.

Makipasetkami iti ibabangon ti siudad. Adelante Zamboanga!#