EDITORIAL: Napatpateg ti pannakatunton ti kinapudno

Dakkelen ti nabusbos ti House of Representatives (ken ti pagilian) iti pannakausig ni Supreme Court Justice Renato Corona babaen ti impeachment.

Iti report ni An Waray Representative Florencio Noel, chairman ti House committee on accounts, nakabusbosen ti Kamara iti nasurok a P3.5 million iti nasurok dua a bulan a pannakadengngeg ti impeachment trial ni Chief Justice Corona.

Agdagup iti P1.9 million ti nabusbos para iti supplies idinto a P1.56 iti food expenses.

Ala, dakdakkel koma pay ti nabusbos no saan a libre ti serbisio dagiti aganay 50 a pribado nga abogado a mangtultulong iti House prosecutors nga agdagup iti 11. No adda man pakairanudan dagiti private prosecutors isu ti pannakaisubli ti mabusbosda iti gasolina iti idadar-ayda iti impeachment trial.

Saan a ninamnama ngamin ti prosekusion nga agpaut iti nakurang a tallo a bulan ti panangipresentada kadagiti ebidensiada kadagiti articles of impeachment maikontra ken ni Corona, nangruna kadagiti daga ken condominium ken bank deposits ti chief magistrate.

Ninamnamada ngamin nga aglusulos met ni Corona, kas ken ni Ombudsman Merceditas Gutierrez sumagmamano nga aldaw kalpasan a na-impeach iti Lower House ket awanen ti madengngeg a panagusig iti Senado nga isu ti intuding ti Konstitusion nga agpaay nga impeachment court.

Kasta met nga iti kalkulasionda ket dua laeng a lawas ti panangipresenta ti Depensa kadagiti ebidensiana a pangonkra kadagiti impresenta ti prosekusion.

Ita, kasapulan pay ti kanayonan a P1 milion agsipud ta adda pay la trial mangrugi no  Mayo 7  ken manamnama nga umabot iti umuna a lawas ti Hunio, agngangabit nga umanay ti P 5 milion nga inisial nga impondo ti Kamara para iti daytoy a panagusig.

Ti saludsod: adda met la pakapnekan ti pannakabusbos ti kasta kadakkel a kantidad para iti pannakausig ti kangatuan nga opisial ti hudikaria maigapu iti mapapati a saanna a panangilanad iti pudno a balor dagiti sanikuana ken nakalemmeng a deposito (peso ken doliar) iti statement of assets and liabilitiesna and networkna?

Iti bukodmi a panirigan, nupay dakkel ti nabusbos iti impeachment trial, saan koma a daytoy ti timbangen no di ti pannakatunton ti kinapudno. Dakkel ti nabusbos ngem dakdakkel ti mapasubli ti pagiliantayo: ti pannakapatalged a ditoy pagiliantayo, adda pay la hustisia ken agturayto latta ti kinapudno ket maipakat latta ti ngipen ti linteg iti asinoman a naglabsing, uray kasano kangatona a kas iti chief justice ti Korte Suprema.#