EDITORIAL: Napeggad ti paltog iti ima dagiti saan a responsible a tattao

   Ti naipadamag itay nabiit a pannakapapatay ti maysa a guardia babaen ti padana met laeng a guardia ti mangpatalged a saan a rumbeng nga agiggem iti paltog ti maysa a saan a responsible a tao, nangruna iti maysa nga otoridad a pakaibilangan dagiti guardia, polis, ken soldado, ken uray pay dagiti nangato ti saadna a tattao iti man kagimongan wenno iti koridor ti turay.

Ti pannakapapatay ni Allan Quides, maysa a guardia, ti dakdakamatenmi. Napapatay ni Quides babaen met laeng ken ni Dante Bangalan, padana a security guard iti Makati City Bank.

Rimmuar iti inbestigasion a masansan a maladaw ni Quides nga agreport iti dutyna, karelibo ni Bangalan. Saan a nagustuan ni Bangalan ti  masansan a pannakaladaw ni Quides ngem saan a nagun-uni.

Iti dayta a bigat, nalabesen ti oras nga agrinneliboda ngem di pay simmangpet ni Quides. Nakariknan ni Bangalan iti pannakarurod. Ad-addan a kimmaro ti rurodna idi simmangpet ni Quides iti bangko a di pay nakauniporme.

“Kaska la anak ti Dios! Naladawka la ngaruden, dika pay nakauniporme,” imparupa kano ni Bangalan.

Saan a nagustuan daytoy ni Quides ket daytoy ti nagramutan ti panagsubangda.

Mapapati a kinarit ni Quides ni Bangalan nga agboksingda ngem nagtungpal nga inasut ni Bangalan ti paltogna sana pinaltogan ni Quides a nakapuntaan ti tian daytoy ken nakatayanna.

Iti kaudian a report, makasuan ni Bangalan iti murder.

Ngem saan a daytoy ti tumtumbokenmi no di ti kinapudno nga adu a gun owners ti saan a responsible nga agikut iti armas. Adu dagiti krimen iti pagilian ti pinataud dagiti awan kaes-eskanna a riri ngem gapu ta adda paltog ti maysa, daytoyen ti inaramatna a pinangkettel iti biag ti kasusikna.

Madakamattayo ditoy ti riri mainaig iti trapiko a nangpaltogan ti maysa nga anak ti mahistrado iti kinasusikna a puon ti ipapatay daytoy. Sabali laeng ti pannakapapatay met ti maysa a negosiante gapu laeng iti riri iti parkingan.

Adda pay dagiti insidente ti pammaltog gapu laeng iti nabara a diskusion bayat ti panagiinom iti nasanger. Adda pay daydiay napaltogan iti videoke gapu ta impapilitna ti nagkanta uray no disintonado ti boses. Saan a nagustuan ti maysa a kustomer ket inasutnan ti paltogna sana pinaltogan ti trying hard a singer.

Iti ababa a pannao, kasapulan ti naing-inget pay a requirements sakbay a  mailako dagiti paltog kadagiti umili. Kasapulan a    kontrolen ti kapolisan ti panagiyisiona iti permit nga agtagikua iti paltog wenno agikut iti paltog iti ruar ti pagtaengan. Maipakatan koma pay dagiti aplikante nga agtagikua iti paltog iti drug test wenno psychiatric exam tapno maammuan amangan no adda nalukay a turnilio iti ulona.

Kuna la ketdi dagiti agta-gikua iti paltog a kasapulanda daytoy a kas depensada kadagiti dakes a tattao. Agpayso dayta.

Ngem makunami met: saan a napeggad ti paltog iti ikut ti maysa a responsible a tao. Napeggad laeng ti paltog no adda iti ikut dagiti di nasimbeng ti pampanunotda, dagiti abusado, dagiti saan a makalawlaw iti kelleb, dagiti aggagatel ti imana nga agpaputok, ken dagiti tattao a panagriknada, panagkitada iti bagida, isudan ti katangkenan, katuredan, kalalakian ket awanen ti ipirpiritda a tao no adda iggem wenno sakibotda a paltog.

Iti ababa a pannao, kasapulan ti kontrol iti panagiyisio iti lisensia iti paltog.#