EDITORIAL : Napingpinget a panangpasardeng iti extra-judicial killings

Indagadag itay nabiit ni US Ambassador to the Philippines Harry Thomas ti napingpinget a tignay ti gobierno a mangpasardeng iti extra-judicial killings no kayatna nga agtuloy ti tulong ti Estados Unidos.

Kinuna ni Tomas a maseknan unay iti nabuntog a pannagna dagiti inbestigasion mainaig kadagiti extra-judicial killings ken pannakadusa dagiti nagisayangkat, iti baet a nangted ti gobierno ti Estados Unidos iti Pilipinas iti $3.5 million manipud idi 2007 agingga iti 2010 tapno maaramat para kadaytoy a pannakaipagna ti hustisia.

Nagbatayan ni Tomas iti daytoy nga imbunannagna ti maysa a report ti US State Department a nagkuna nga adda latta dagiti maisaysayangkat a pammapatay iti babaen ti administrasion Aquino ken saan a napinget ti pannakaimbestiga dagiti napalabas a kaso ti pammapatay ken panagabuso iti kalintegan pantao.

Madakamattayo ditoy ti nabuntog a panaguyas ti kaso a masaker idiay Maguindanao a nakapapatayan ti 57 a tattao a mapapati babaen ti pammilin ti maysa a nabileg a kaamaan dagiti politiko. Dandanin dua a tawen manipud pannakapasamakna, di pay naragpat dagiti biktima ti hustisia.

Madakamattayo pay nga imbatad ti Human Rights Watch ken ti Amnesty International a saan a natungpal ni Presidente Aquino ti karina idi agtugaw a pangulo ti pagilian a mangpugipog iti extra-judicial killings ken panagabuso.

Kinuna pay ti grupo a mangsipsiput iti pannakaabuso dagiti kalintegan pangtao a kalpasan ti makatawen a panagturay ni Aquino, saan a nabaelan ken awan ti duri ti administrasionna a mangdusa kadagiti soldado a nagabuso ken nagpatay kadagiti aktibista a makakannigid iti panangiwayatda iti nalawlawa a kampania maikontra iti insurhensia iti pagilian.

No kayat ti administrasion Aquino nga agballigi iti pannakadusa dagiti nagisayangkat kadagiti pammapatay, kasapulan a paidarasna ti proseso ti panagimbestiga tapno madagdagus a maisaklangĀ  dagiti akusado ken mausigda iti korte. Ingget buntog ti inbestigasion kadagiti extra-judicial killings ta umabot pay iti 10 a bulan.

Awan ti nangatngato ngem iti linteg. No nakabasol iti linteg, uray asino ti katataona, uray kasano ti kangato ti posisionna, uray kasano kabilegna iti koridor ti turay, masapul nga ikarona iti pagbaludan no mapudasdasan a nakabasol. Daytoy ti masapul nga ipaneknek ti administrasion Aquino no kayatna a mapasardeng dagiti extra-judicial killings.#