EDITORIAL: Nareppeten ti ima ti Senado

Iti panangsarurong ti Korte Suprema iti petision ni dati a NEDA chair Romulo Neri a kalinteganna babaen ti executive privilege a saan a sungbatan dagiti saludsod dagiti senador mainaig iti panagpatangda ken ni Pres. Gloria Macapagal-Arroyo mainaig iti mapapati a panagpasuksok iti National Broadband Network deal, arigna nareppet itan ti ima ti Senado a mangiwayat kadagiti panagpalutpot kadagiti anomalia iti gobierno.

Kas ita, kinuna ni Executive Secretary Eduardo Ermita a saanen a sumaklang dagiti kameng ti Gabinete ken dadduma pay nga executive officials no mapaayabanda iti hearing iti Senado agingga iti awan ti maipablaak a paglintegan kadagiti pagiwarnak kas imbatad ti Korte Suprema iti pangngeddengna.

No suroten ti panagpampanunot ni Ermita, iti kallabes, inabuso ti Senado ti autoridadna a nangayab kadagiti opisial ti turay kadagiti hearing agsipud ta awan ti naipablaak a paglintegan kadagiti pagiwarnak ket maikonsidera ngarud a saan a balido dagiti inquiry nga insayangkatna.

Iti panirigan ti executive secretary, saanen a mapilit dagiti senador dagiti executive officials nga agparang iti Senado no di kayat dagitoy, ket mabalinda lattan a dakamaten a pagrasonan ti pangngeddeng ti Korte Suprema.

Nawaya latta dagiti senador nga agkamang iti korte tapno malawlawaganda, kinunana pay.

Masaludsod: iti daytoy a pangngeddeng ti Korte Suprema, ania pay ti serbi ti Senado a mangsiput ken mangbalanse tapno saan nga agabuso ti sabali a sanga ti gobierno a kas iti Ehekutibo?

Wenno iti nalawlawag a pannao, kasano pay a matuntonan ti kinapudno mainaig dagiti anomalia iti gobierno  no saan metten a maitaltalek dagiti paayab ti Senado kadagiti opisial ti turay nga adda pannakaibiangna kadagitoy a proyekto ken uray no sumaklangda man, mabalinda latta a saan a sungbatan dagiti saludsod gapu ta dakamatenda a kalasag ti executive privilege?

Kasta met a mabalinen dagiti opisial ti turay a timmakias iti pagilian tapno itarayanda a sungbatan dagiti anomalia a nakaisawsawanda ti agsubli agsipud ta saanen a mapilit ida ti Senado nga agparang pay iti hearing ken nangnangruna, addan ti executive privilege a paglingedanda.

Iti daytoy a pangngeddeng ti Korte Suprema, uray agdadatan a naugingan ti maysa nga opisial, agkamang laeng iti executive privilege tapno saan a mapagsungbat iti inaramidna wenno inaramid ti adda iti ngatuenna.

Makuna a landmark daytoy a desision ti Korte Suprema mainaig iti executive privilege. Kas kuna ti chief justice, narigaten a mabalbaliwan pay ti pangngeddengda, lalo no awan ti napigsa nga argumento nga idatag dagiti senador.

No agbanag a kasta, piningasan ti Korte Suprema ti maysa a co-equal a sanga ti gobierno.#