EDITORIAL: Nasisita ti Proteksion dagiti Ubbing

Uray iti panawen ti gubat wenno kalamidad, ad-adda pay a maiserbi ti kalintegan dagiti ubbing, nangruna kadagiti sitatalged a nagkamang kadagiti evacuation centers. Nasisita a maipaayanda iti nakananama a kasapulanda iti inaldaw-aldaw ken mailisida iti aniaman a banag nga ad-adda pay a mangdegdeg ken mangilanlan iti sagsagabaenda a didigra. Nasken a maited kadakuada dagiti kangrunaan a kasapulanda, saan laeng a maipanggep iti inaldaw a taraon ken natalged a kamangan no di uray dagiti kasapulanda maipapan iti pannakasaluad ti salun-atda.

Ti maipapan iti salun-at ti dakkel a pagdandanagan dagiti health workers ken volunteers a mangas-asikaso kadagiti evacuees sadiay rinabngis ti gubat a Zamboanga City. Agkurkurang dagiti kasilias ken portalets nga usaren dagiti dupudop a mangusar, gapu iti dayta, matektekan ken masulit dagiti ubbing a makipila iti nakaat-atiddog, isu nga uray no sadino la ditan ti inda pagpugpugiitan. No saan a maipaay dagiti nasisita a kasapulan dagiti ubbing kadagiti 35 nga evacuation centers, nakarkaro pay ngem gubat ti sagabaen dagiti umili iti panagraira dagiti sakit. Addan dagiti nagsakit iti kamuras, panagibleng (diarrhea) ken conjunctivitis, a kas iti inreport ti Crisis Management Committee. Isu nga umar-ararawda iti donasion, saan laeng a taraon, lupot, no di pay ag-agas agraman kadagiti pangmantener iti natalged a salun-at. Ta nalaka a kapten ti sakit dagiti ubbing iti evacuation center.

Yantangay ta bulan ti Oktubre ita, ti tinawen a panangselebrar iti National Children’s Month, panawen nga ipakita  ken iparikna ti panagayat, nangruna kadagiti adda iti uneg dagiti evacuation centers nga agkasapulan iti madagdagusda a tignay.

Maselebraran ti National Children’s Month  kas sagudayen ti Presidential Decree 603 wenno ti Child and Youth Welfare Code ken ti Presidential Proclamation 267, series of 1993, a napauluan iti “Declaring the Month of October of Every Year as National Children’s Month…” Ita a tawen, “Kahirapan Wakasan, Karapatan ng Bata Ipaglaban!” ti tema ti selebrasion.

Maipangpangruna koma dagiti ubbing. Ilisi ida iti aniaman a pagpeggadan, saan laeng a dagiti adda iti evacuation centers no di ket iti amin a lugar. Isaknap ti karbenganda iti sosiedad, dagiti kasapulanda para iti survival, protection and development.#