EDITORIAL: Natangken a Sangi, Kasapulan dagiti Umili

Iti petsa 26 iti daytoy a bulan, Hunio, pannakapaliiw ti International Day Against Drug Abuse and Illicit Trafficking babaen ti panangibunannag ti United Nations Office on Drugs and Crime (UNODC).  Makikaykaysakami itoy sangalubongan a kampania kontra iti makailuod unay a maiparit a droga ken mangtapik iti awareness ti asinoman iti nasisita a pannakibakal iti daytoy nainlubongan a di magalem a sakit ti kagimongan a mangipapaay iti buong ti ulo. Kangrunaan a gandat itoy a pannakibakal ti pannakaragpat ti pannakakontrol no di man naan-anay a pannakapugipog daytoy a parikut ti gimong. Isu a maigunamgunam ti partisipasion ti asinoman tapno agballigi ti ingpen a tartarigagayan.

Iti pagilian, no kasano iti kinapinget ti kampania kontra droga, agtultuloy latta met a saan a malapdan ti agos gapu iti kinalag-an dagiti linteg a sanggiran koma itoy.

Nadagdagsen koma a pannusa ti kasapulan tapno agguddeng dagiti sindikato nga agipuslit iti droga, tapno saan a gandaten dagiti ganggannaet ti agipatakder iti laboratorio, ken tapno malapdan nga agdakiwas ti gamat dagiti aglaklako. Kasapulan ti natangtangken a sangi iti pannakaipakat dagiti linteg; saan laeng koma nga agpatingga iti bokadora no ket iti napintek nga aramid.

Kasapulan ti partisipasion ti amin nga umili ta saan a kabaelan dagiti agrebbeng no isuda laeng ti makibakal itoy a  parikut. Adda maparnuay  a bileg iti panagkaykaysa ket magutugot ti awareness dagiti umili a makipartisipar iti arungaing, ken mapagtignay nga agnanayon ti alertness dagiti agrebbeng nga ahensia tapno malapdan ti panagdursok dagiti sindikato ken grupo nga agparpartuat,  agiwaras ken aglako iti maiparparit a droga.

Ania ngarud ti kasayaatan nga aramiden tapno magun-od ti balligi iti pannakibakal itoy a sakit ti kagimongan?

Kasapulan ti natangtangken a sangi ti linteg tapno saan a kabaelan a pusien wenno lusotan dagiti mananggundaway; saan a basta lattan ideporte dagiti matiliwan a ganggannaet ta mangipaay laeng iti seniales iti kinalukay ti barikes ti linteg; agsiput a nalaing kadagiti maiserrek iti pagilian a ramen iti panagpartuat itoy; ireport kadagiti agrebbeng ti asinoman nga aglaklako ken agar-aramat itoy. Awan kabulen ti International Day Against Drug Abuse and Illicit Trafficking  no tuppol ti linteg.#