EDITORIAL: No agtestigo ni de Venecia, anianton?

Kinuna ni dati a House Speaker Jose de Venecia a  mabalin a pakatippuogan ni Pres. Gloria Macapagal-Arroyo no ibagana dagiti ammona mainaig iti National Broadband Network-ZTE deal.

Yan ti rigatna, adda ngata tangken ni de Venecia nga agtestigo?

Madakamat ditoy a ti kanagnaganna nga anakna, ni Joey, ti nangibutaktak iti mapapati nga iregularidad mainaig iti nasao a proyekto a mamagsisilpo amin nga opisina kadagiti siudad ken probinsia babaen ti maysa a broadband network.

Gapu iti napudot a kontrobersia a pinarnuay ti butaktak ni ub-ubing a de Venecia, nairiing manen dagiti tignay a mamaglusulos ken ni Pres. Arroyo a nakaigapuan iti panangkanselana iti nasao a proyekto. Ngem daytoy met ti nakaigapuan ti pannakapadisi ni laklakay a de Venecia babaen ti panangidaulo dagiti dua a diputado nga anak ti Presidente.

Idi impalgak ni ub-ubing a de Venecia dagiti mapapati nga iregularidad iti NBN-ZTE deal, saan a nagtimtimek ni dati nga Speaker de Venecia agsipud ta suportado iti Presidente. Uray idi kangitingit dagiti tignay a mangpaikkat ken ni Pres. Arroyo gapu iti alegasion a panagsuitik iti eleksion idi 2004, ni de Venecia ti maysa kadagiti kaaliado a kangrunaan a nangsalsalaknib iti Presidente. Iti babaen ti lideratona, saan a pulos dimmur-as dagiti impeachment complaint nga impila ti oposision ken dagiti kritiko ti Presidente iti Kamara.

Ngem iti iruruar dagiti retrato a mapapati a naala idi sekreto a simmarungkar ni Pres. Arroyo, ti First Gentleman, a karaman ni de Venecia, nairiing manen ti pannakaituloy ti hearing iti Senado. Ita, uy-uyotan dagiti senador ni de Venecia a sumango iti Senado tapno ikkanna iti pannakailawlawag no ania ti napasamak bayat ti kaaddada iti headquarters ti ZTE iti China.

Ita pay laeng, agkutkutin dagiti kaaliado ni Pres. Arroyo tapno matagibassit aniaman nga ilatak ni de Venecia iti Senado – no talaga nga ibutaktakna dagiti ammona mainaig iti ZTE deal.

Kuna dagiti kaaliado ti Presidente nga awan ti dagsen ti testimonia ni de Venecia agsipud ta anakna ti maysa kadagiti naatiw iti bidding iti nasao a proyekto ket ngarud, mapagduaduaan aniaman nga ibutaktakna.

Iti sabali a bangir, no agtestigo ni de Venecia, posible a maisurot a maimameg agsipud iti posible nga adda pannakaibiangna no adda man anomalia a naigalut iti proyekto.

Kasta met a no agtestigo ni de Venecia, apay nga ita laeng? Sumagmamanon a gundaway a kinasapulan ti panagtimekna ngem nagulimek. Iti aniaman a panirigan, pinalusposan ni de Venecia dagiti gundaway a mangitag-ay kenkuana iti pedestal ti kinaindaklan iti imatang dagiti umili.

Maymaysa ti rason a manglaplapped ken ni de Venecia nga agtimek – posible a mairaman a maladam iti bukodna a balikas iti kanito nga ipalgakna ti ammona maipapan iti NBN-ZTE deal.

Namsek iti kaipapanan dagiti balikas ni Sen. Myriam Defensor-Arroyo: ania ti ar-aramiden ni de Venecia iti Zhenzhen, China idinto nga awan met ti legal nga obligasionna a makipatang kadagiti opisial ti ZTE?

Dayta ti narigat a mairasonan ni de Venecia ken posible a pakairamananna a pakaugingan no agtestigo iti Senado.#