EDITORIAL: No ania ti mariknada ti patien dagiti umili

Iti kaudian a surbey nga insayangkat ti Social Weather Stations (SWS), bimmaba ti pannakapagusto ti publiko iti panagtrabaho ni Presidente Benigno Aquino III manipud iti “nakasaysayaat” iti “nasayaat” laengen. Iti daytoy a surbey, nainterbio ti 1,200 nga adults

Daytoy ti maikadua a gundaway a naikkan iti grado a “nasayaat” laeng ti Presidente, umuna idi Hunio 2011.

Naisayangkat ti kaudian a surbey ti SWS manipud Marso 10 agingga iti 13 ket kas naammuan iti resulta ti surbey, bimmaba ti grado ni Pres. Aquino manipud iti “very good” a nakapuntosanna idi iti 58 (71% napagustuan kontra 13% iti saan a napagustuan) iti “good” a nakagun-odanna iti 49 puntos (68% napagustuan, kontra 19% di napagustuan) wenno nababbaba ti performance ratingna iti dua a puntos. Limtuad iti surbey a dakkel a nakagapu ti saan a pannakapagusto iti Presidente gapu iti mapapati a kinaawan ti ar-aramidenna a mangipaay sulosion mainaig kadagiti problema dagiti umili kas iti panagtuloy ti panagngato ti presio ti fuel, panagngina dagiti presio dagiti basic commodities ken serbisio, nababa a sueldo, kaawan panggedan, ken iti pannakarakrak dagiti balay dagiti eskuater.

Kas maagsaw iti daytoy a surbey, no adda dakkel a pakapattogan ti maysa nga administrasion iti mata dagiti umili, awan sabali no di ti agtultuloy a panagngato ti presio ti lana numona ket pagbalbalinen dagiti kritiko ti agdama nga administrasion a dakkel nga isyo dagitoy a panagngina ti presio ti fuel. Wenno iti sabali a pannao, uray iti baet ti panangibambando ti gobierno a simmayaat ti situasion iti stock market, ingangato ti panagtalek dagiti agipupuonan iti panagnegosio iti pagilian, saan nga agtalukatik dagitoy kadagiti napanglaw agsipud ta ti laeng nasken kaduada ti kaadda ti maiyapuyda iti inaldaw-aldaw.

Iti biangmi, nupay ar-aramiden ti gobierno Aquino ti kabaelanna a mangitag-ay iti kalidad ti panagbiag dagiti umili, saan nga umdas dagitoy ket kasapulan nga ad-adda pay nga igaedna tapno marikna dagiti tattao dagiti nagapuananna.

Husto ti nakuna ti maysa a opisial ti KMU nga ad-adda a patien dagiti tattao ti sikaw ti awan naggianna a bitukada ngem kadagiti ibambando ti gobierno a nagsayaatan ti panagbiagda iti babaen ti nasayaat a panangituray dagiti agtuturayna.#