EDITORIAL: No Bio, No Boto, saan a nainkalintegan

Nangiyisio ti Korte Suprema iti temporary restraining order (TRO) iti Commission on Elections a mangiyimplementar iti “No Bio, No Boto” a paglinteganna para iti panagbubutos inton Mayo 2016.

Kanaig daytoy, imbilin ti korte iti Comelec ken iti Solicitor General ti panangsungbatda iti petision nga impila ti sumagmamano a grupo a pakaibilangan ti Kabataan Party-list, National Union of Students of the Philippines, Anakbayan, College Editors Guild of the Philippines, ken League of Filipino Students ken panangisubmiteda iti komentoda iti las-ud ti 10 nga aldaw.

Nagultimo idi Oktubre 31 ti panagrehistro dagiti botante nga awan pay ti biometrics da tapno makabutosda iti eleksion inton Mayo 2016.

Kas maibatay iti rekord ti poll body, nasurok a tallo a million a rehistrado a botante ti awan biometricsda.

Ngem nagipila iti petision dagiti nadakamat a grupo iti ngato iti Korte Suprema a waswasenna dagiti resolusion ti Comelec para iti pannakaimplementar ti No Bio, No Boto a paglintegan ken ti Republic Act 10367 a nangituding ti mandatory biometrics voter registration agsipud ta salungasingen daytoy ti Konstitusion agsipud ta labsingenna ti kalintegan dagiti konstitusional a kalintegan dagiti nasurok tallo million a botante nga agbutos gapu laeng ta saanda a nakapagrehistro iti kasapulan a biometrics.

Ngem kinuna ti Comelec a gapu iti TRO nga inyisio ti Korte Suprema mainaig iti implementasion ti No Bio, No Boto, agtungpal daytoy iti ad-adu a bilang ti flying voters ken at-atiddog a pila kadagiti pagbutosan a presinto iti eleksion inton Mayo 2016.

Kinuna met ni James Jimenez, parasao ti Comelec, a maapektaran ti TRO ti panagsaganada iti eleksion agsipud ta masapul nga iaddiasda ti project of precincts tapno maakomodar dagiti botante nga awanan biometrics.

Ngem no immannugot koma ti Comelec a maikkan iti sabali pay nga extension iti panagrehistro dagiti botante iti biometrics, mabalin nga awan koma dagitoy a petision a sungbatanna iti Korte Suprema.

Dakkel unay a bilang ti nasurok tallo million a botante a saan a makabutos gapu laeng ta awan ti biometricsda. Iti daytoy a kadakkel ti bilang dagitoy a botante, kabaelanna a tippuogen ti maysa a kandidato iti masungad nga eleksion.

Yan ti rigatna, adu ngamin dagiti sukir a botante a sada la agkuti iti maudi nga oras.#