EDITORIAL: No mapasamak ti gubat a nuclear, maungawen ti tao!

Iti panagadal ti Nobel Peace Prize-winning International Physicians for the Prevention of Nuclear War ken Physicians for Social Responsibility nga insayangkatda idi Abril 2012, no gumil-ayab ti gubat a nuklear iti nagbaetan ti India ken Pakistan, dua a pagilian nga armado iti nuklear a bomba, matay ti dua a billion a tattao a posible a manggibus iti sibilisasion ti tao.

Uray no limitado laeng ti kalawa ti gubat a nuklear iti nagbaetan dagiti dua a pagilian, dadaelenna iti kasta unay ti atmospera a mangdalupo kadagiti mula nga agresulta iti nakaro a panagbisin a mabalin a mangkettel iti biag iti billion a tattao, segun iti nasao a report.

Nalidlidem manen ti senario no gumil-ayab ti nasaknap a gubat nuklear iti nagbaetan ti United States ken Russia – mapasamak ti nakaro a chaos ken posible la ketdi a pakaungawan ti puli ti tao, nakuna ti report.

No mapasamak ti gubat a nuklear iti Abagatan nga Asia, maipug-aw dagiti nangisit a carbon aerosol particles iti tangatang a mangdalupo iti produksion ti US a mais ken soybeans iti agarup 10 porsiento iti nasurok a dekada ken mangpabassit iti produksion iti bagas ti China iti average a 21 porsiento iti las-ud ti uppat a tawen ken iti sabali pay a 10 porsiente iti sumaruno nga innem a tawen, malaksid laeng iti nakaro a pannakaapekto ti produksionna iti trigo agsipud ta agsuek iti 50 porsiento iti umuna a tawen kalpasan ti gubat a nuklear ken 31 porsiento iti baba ti baseline iti sumaruno a dekada.

Limitado man wenno nasaknap a gubat nuklear, ingget lidem ti senario nga ipaay daytoy iti tao: agsaknap ti nakaro a panagbisin ken chaos a di pay napadasan ti lubong manipud pay idi un-unana a panawen!

Igunamgunammi ngarud a mapugipog amin a nuklear nga armas nga adda iti ikut ti siam a pagilian a pakaibilangan ti US ken China. Ngem ti saludsod: desidido kadi dagitoy siam a pagilian a mangpukaw kadagitoy armasda a nuklear?

Kabayatanna, agkararagtayo laengen, kakabsat, nga agtalinaed a natalinaay ti panagpampanunot dagiti agtuturay dagitoy a pagilian tapno saan a masindian ti gubat a nuklear a mangukom kadatayo a nabiag ditoy a lubong!