EDITORIAL: Pabor iti agdama nga administrasion

Maysa nga agilinlinteg iti Kamara ti nangannugot a pabor iti agdama nga administrasion ti pangngeddeng itay nabiit ti Korte Suprema a panagtugaw dagiti party-list representatives.

Kas resulta ti pangngeddeng ti Korte Suprema, nakatugawen ti aganay 32 a party-list representatives. Kayatna a sawen, nagbalindan a pannakabagi dagiti marginalized sectors iti akimbaba a lehislatura.

Napintas koma a pagilasinan daytoy nga agtungpal iti panagbalin metten nga independiente ti Kamara iti sanguanan ti kapaliiwan nga adda daytoy iti saklot ti agdama nga administrasion. Ngem kas iti kapanunotan ti maysa a kritiko ti administrasion, makitami a pabor iti agdama a gobierno ti panagtugaw dagiti party-list representatives.

Makunami daytoy agsipud ta iti panangpadasmi a mangsukimat kadagiti nagkandidato para iti party-list groups, nadlawmi nga adda dagiti saan a pudpudno a mangibagi iti grupo. Nadlawmi pay nga adda dagiti nangato nga opisial dagiti opisina iti turay a nagkandidato, kasta met nga asideg iti Malakaniang dagiti dadduma a kandidato.

Iti eleksion idi 2007, maysa a dakkel nga isyo ti kaadda dagiti kandidato nga induron wenno tinulongan ti Malakaniang tapno mangabakda.

Apay a makunami a ti Malakaniang ti agimbag iti kastoy a situasion? Siempre, no tinulongan ti Malakaniang dagitoy a party-list groups tapno agbanduriada iti napalabas nga eleksion, agbalinda a kaaliado ti agdama nga administrasion.

Ammotayon no kasano ti kinadakkel ti akem ti mayoria iti panagballigi wenno pannakapaay ti maysa nga administrasion mainaig iti pannakalusot dagiti naipangruna a gakat, programa wenno proyektona iti lehislatura, iti man Kamara wenno iti Senado. Iti babaen ti Kamara a mayoria ti kaaliadona, awan ti dakkel a problema ti administrasion iti pannakaiduron dagiti pet projects ken programana.

Iti laengen panagtugawda, limtuaden ti pudpudno a kolor dagiti party-list representatives ta mismo a ni Pres. Arroyo ti namagsapata kadakuada.

Adda pagsasaotayo: agmulaka tapno apitem. Nagmula ti Malakaniang ket itan, apitenna ti intukitna a bukel: ti manamnama a suporta dagiti pinangabakna a party-list groups iti aniaman a programana ken proyektona ken mangsalaknib kenkuana kadagiti problema ken isyo a pakaisawsawanna.

Sangkakuna ti Malakaniang a parupa dagiti komunista dagiti militante a grupo a nakipaset iti party-list elections. Iti sabali a bangir, mabalintayo met a kuna a parupa ti Malakaniang dagiti grupo a nakipaset iti daytoy met laeng nga eleksion.

Maymaysa ti kayatna a sawen dayta: adu dagiti abut iti linteg mainaig iti party-list representation ket daytoy ti maab-abuso iti agdama.

Kasapulan nga ipakat ti Comelec ti naing-inget nga screening kadagiti party-list groups nga agaplikar a makipaset iti masungad a party-list elections tapno makutuan dagiti itta iti pudpudno a grupo a mangibagi kadagiti marginalized sectors.#