EDITORIAL: Pagilian iti Middle East, saanen a natalged a pagtrabahuan

Siam a pulo ket walo a kakailiantayo ti naggawid ditoy Filipinas manipud iti Beirut. Sakbay ti panaggawidda, naggian dagitoy iti Filipino Workers Resource Center iti nadakamat a pagilian.

Iti sabali pay a damag, duapulo ket lima a Filipino nga agtrabtrabaho iti Amman ti simmangpet ditoy pagiliantayo. Naggianda met iti Center a nairanta para kadagiti OFWs a kailiantayo a naglibas wenno tinarayanda dagiti amoda wenno pagpapaayanda.Ā  Ti met laeng DFA ken ti Embahadatayo ti nangibaklay iti plane ticketĀ  ken nakaammo kadagiti kasapulan a travel documents dagiti naggawid.

Iti sabali a bangir, nasurok a duapulo dagiti kailiantayo ti boluntario a naggawid manipud iti pagilian a Yemen gapu iti dumakdakes a situasion iti nasao a pagilian maigapu kadagiti protesta dagiti agindeg maikontra iti gobiernoda.

Kastoy man met laengen ti pannakaipit dagiti kailiantayo idi bimtak ti riribuk iti Tunisia, Egypt, Lebanon a nakapattogan dagiti agtuturay dagitoy a pagilian, ken dagiti demonstrasion ken protesta a Syria, Iran, Yemen, Bahrain ken Libya a napilitanda a nagtaray iti sarikedked ti Embahada ti Pilipinas.

Kasta karisgo ti biag dagiti kailiantayo a napan mangged iti Middle East a kaadduanna ita ti saan a natalingenngen a pagtrabahuan gapu kadagitiĀ  demonstrasion ken protesta maikontra iti gobiernoda. Ti makadakes, adu kadagiti kakailiantayo ti naggawid ditoy pagiliantayo nga awan a pulos ti namnamaenda a benepisio manipud iti OWWA wenno POEA agsipud ta nagturongda kadagiti nadakamat a pagilian nga awan ti legal a dokumentoda. Iti nalawlawag a pannao, illegal ti iseserrekda kadagiti nasao a pagilian.

Sangkapalagip dagiti agtuturay ti POEA ken OWWA ti saan koman nga ipapan dagiti kailian a mangged kadagiti pagilian a kas iti Lebanon, Iraq, agsipud ta saan a natalingenngen ti situasion politikal kadagitoy a lugar ngem nagtungpal laeng iti tuleng a lapayag.

Kasapulan ngarud ti naing-inget a panagmonitor ti gobiernotayo kadagiti kailian a mapan mangged iti Middle East nangruna dagiti pagilian a saan a natalingenngen ti situasion ti politika. Buong la ti ulo kadagiti agtuturaytayo ti itden dagiti kailiantayo a maipit kadagiti riribuk kadagiti nasao a pagilian.

Ngem no apay ketdi a di matengngel ti gobierno dagiti kailian nga aglibas a sumrek kadagitoy a pagilian. Agdadata a nalukay unay ti panangipakat dagiti agtuturaytayo kadagiti paglintegan iti overseas deployment kasta met ti kaawan gawayna kadagiti agraraira nga illegal recruitment agencies.#