EDITORIAL: Pait iti karabukob

Maysa a damag manipud iti New York ti nakaawis iti imatangtayo itay nabiit, ti pannakaikkat ti maysa nga police officer iti puestona gapu iti panangibulgarna iti panangkalub dagiti opisialna iti pudno a mapaspasamak tapno laeng agtalinaed a napintas ti imahe ti departamento nga iturayanda.

Naipan ni Police Officer Adrian Schoolcraft iti maysa a hospital psychiatric ward ken pilit a naikkat iti police force kalpasan ti panangibulgarna a pinalsipika dagiti superiorna dagiti rekord tapno agparang a bassit ti crime rate iti estasionda.

Saantayon a busisaen ditoy ti merito ti nasao a kaso. Ngem adda pagkaingasan daytoy a napasamak iti New York iti masansan nga ar-aramiden dagiti agtuturaytayo tapno laeng mapasayaatda ti imahe ti departamento wenno opisinada ket bumanglo ti naganda iti publiko wenno nadardaras ti promosionda iti nangatngato a posision.

Alaentayo nga ehemplo ti masansan a panagbaniaga dagiti lidertayo iti ganggannaet a pagilian. Kapaliiwan a tumuyutoy dagiti sumurot kadakuada kas ā€œpaset ti delegasionā€. No sumangpetdan ditoy pagilian, sangkapasindayag dagitoy nga opisial dagiti adu a parabur ken pagimbagan a nagun-odda iti panagbiaheda. Ngem maysa laeng daytoy a pangkalub iti nagastosda a minilion a kuarta dagiti umili para iti panagpalpaliwada a simmurot iti delegasion.

Adda pay ugali dagiti agtuturaytayo a mangiragpin iti naganda iti maysa a proyekto nupay awan ti pakaibianganda iti daytoy. Agparang a gapuananda ti pannakaaramid ti maysa a kalsada, maysa a pagadalan, ospital, rangtay wenno dagiti dadakkel a proyekto ti nasional a gobiernoĀ  wenno dagiti ahensia ti turay uray awan ti pannakaibiangda wenno naitulongda iti pannakairusat dagitoy a proyekto.

Adda pay dagiti agilinlintegtayo a mangibambando a nagadu ti linteg a naputarda bayat ti panagtakemda ngem ti kinapudnona, nakipagpirmada laeng a kas co-sponsor iti gakat.Ā  Yan ti rigatna, no addadan iti probinsiada, pagbalinendan a kasla bukodda a putar dagitoy a gakat a nagbalin a linteg.

Kasta dagiti dadduma a lidertayo. Pasam-itenda ti bugguong, takupanda ti lussok, papudawenda ti nangirngir tapno laeng maital-o ti naganda wenno ti idauluanda nga ahensia.

No denggem dagiti agtuturaytayo, dumurdur-as ti pagilian, sumaysayaat ti ekonomiana, umad-adu dagiti panggedan, dumakdakkel ti sueldo dagiti mangmangged.

Nagsayaatan koman no agpayso dagitoy ibalbalikasda. Yan ti rigatna, mabukel ti palso a namnama, sumngay dagiti balangkantis nga arapaap ket makananamtayo iti pait iti karabukob inton maamiristayo a sabali gayam iti kinapudno ti nagasut iti balitungeg a dilada.#