EDITORIAL: Pakatingitingan ti puersa da PNoy ken Binay

Itay Oktubre 1 agingga iti 5, 2012 ti intuding ti Commission on Elections a panagipila dagiti kandidato iti certificate of candidacy para iti eleksion inton Mayo 2013.

Ekspektarentayo ti panagsisinnikil dagiti kandidato tapno isuda ti agbalin nga opisial a kandidato wenno magun-odda ti aglaplapusanan a bendision ti “ngato”. Ditoy a magna ti sinnikap, kinnaradap, panagpipinniltak tapno maikkat wenno maiwalin iti dalan ti bangen wenno lapped iti pannakataginayon ti bileg ken pigsada a kas politiko.

Ta saan a mailibak nga uray senador ken dagiti diputado laeng dagiti mabutosan iti masungad nga eleksion, napateg daytoy iti agdama nga administrasion tapno mapapigsana ti kapetna iti Kamara ken iti Senado tapno awan sawir wenno tibbakol ti pannakaipasa dagiti prioridadna a proyekto ken programa. Agbalin a barometro daytoy nga eleksion no “tagapulot” pay laeng dagiti umili ti agdama nga administrasion wenno saanen a kas kabanglona idi kadagiti tattao a nangibayog kenkuna iti eleksion idi kanikatlo a tawen ti napalabas.

Idi kanikatlo a tawen, nagampayag ni Presidente Benigno Aquino III ket insualitna dagiti kinabalubalna a pakairamanan ni Sen. Manny Villar iti baet ti nalanaan a makinaria daytoy a nangpataray iti kandidaturana.

Iti daytoy nga eleksion, ikut kadi pay ni PNoy ti sappuyot dagiti tattao ket butosanda dagiti kandidatona para iti kinasenador ken kinadiputado? Iti daytoy nga eleksion, kasapulan a lumsot ti mayoria kadagiti kandidato ti administrasion para senador kasta met a agbandoria dagiti kandidatona para diputado tapno mapatalgedanna a kas iti kabanglona pay idi kanikatlo a tawen kadagiti umili wenno botante.

No agparang a kimmapuy ti pigsana kadagiti botante, sigurado a marigatan la ketdi ti kandidato ti partidona para presidente iti eleksion inton 2016.

Iti sabali a bangir, kabangbangloan ni Vice President Jejomar C. Binay. Nangato latta ti ratingna kadagiti surbey, saan pay ketdi a paatiw iti rating ni Pres. PNoy.

No kitaen dagiti naikabil iti line-up ti partido ni Binay para senador, adu kadakuada ti “winnable”. Ket no mainayon pay ditoy ti guyod ni Binay, posible nga adu ti lumsot a kandidatona para senador.

Ngem iti daytoy nga eleksion, ni Pres. PNoy ti pader a dakkel a pakaidugmaanda.

Masipsiputan ngarud ti resulta daytoy nga eleksion. Iti daytoy nga eleksion ti pakakitaan ken pakatingitingan ti puersa da PNoy ken ni Bnay.#