Editorial: Pakauna dagiti ad-adu pay a tignay-protesta

ITAY Biernes, Pebrero 15, nagrali iti Makati City dagiti nadumaduma a grupo a pakaibilangan ti negosio, oposision, militante a grupo, dagiti religious groups, civil society groups, academe ken dadduma pay a grupo  ket imbatadda ti suportada ken ni Rodolfo “Jun” Lozada idinto nga indagadagda ti panaglusulos ni Pres. Arroyo, ni Commission of Higher Education Chair Romulo Neri, ken Department of Environment and Natural Resources Secretary Lito Atiensa.

Uray ti Integrated Bar of the Philippines ken grupo dagiti rebelde a soldado ket imbatadda ti suportada ken ni Lozada.

Mangangay met ti Simbaan iti “Misa ti Kinapudno” a nangawisanda kadagiti tattao a makipartisipar.

Apay a kastoy ti panagramaram dagiti tignay-protesta maikontra iti Malakaniang ken dagiti opisialna ken panagsuyop iti suporta ken ni Lozada?

Ti met laeng Malakaniang ken dagiti opisialna ti pagdas-alan iti pammabasol no apay a kasta ket maitudo ditoy ti narusanger a wagas nga impakatda tapno saan a makapagsarita ni Lozada iti Senado ket idi napaayda, kaarigda iti agpaspasgar a manok a nangpurok kenkuana tapno laeng masalaknibanda ti inaramidda ken asinoman a nangpatignay kadakuada.

Nakita ti sangapagilian no kasano ti panangipetteng dagiti opisial ti turay a saan a “panangdukot” ti napasamak no di “panangsalaknib” ken ni Lozada iti peggad a dida pay ammo ti paggapuanna.

Nakita dagiti tattao kadagiti telebision ken nangegda iti radio no kasano a nagtitinnulongan dagiti senador a kaaliado ti Presidente a dadaelen ti kredibilidad ti maysa a probinsyanong intsik.

Nagkuti ti Ombudsman nga agimbestiga tapno maammuan no adda nasalungasing dagiti tattao a nadakamat iti proyekto a ZTE deal. Imbilin met ni Justice Secretary Raul Gonzalez  ti pannakabuangay ti maysa a panel  nga agpalutpot mainaig iti ZTE deal.  Iti kaudian, maysa nga ahente ti National Bureau of Investigation ti mapapati a nagbukitkit iti  kabinete  iti dati nga opisina ni Lozada ket kinayuskosna dagiti dokumento a posible a mainaig kadagiti transaksion idi isu pay ti pangulo ti nasao nga opisina. Pinaglibakan ti NBI daytoy.

Kuna ni Lozada ken dagiti mangisakit kenkuana: harassment, pangpastidiar kenkuana tapno saannan nga ituloy ti nairugina.

Kabayatanna, pangrugian laeng ti rali itay Biernes  dagiti sumarsaruno pay a tignay-protesta, segun ti United Opposition ken ti Black and White Movement.

Ti makadakes: agingga iti saan nga agpatingga dagiti ikkis kadagiti kalsada, maipasungalngal manen ti pagilian iti sabali pay a krisis a pakaidagelan ti biag dagiti umili.

Ikarkararagmi a saan koma a kasta ti pagtungpalanna. Ngem saan koma a dimteng dagiti pasamak iti kastoy  no saan a naleplepan ti kinapudno.#