EDITORIAL : Palubosan koman ni Cong. Arroyo a pumanaw iti pagilian

Dakkel a saludsod ita no ania ti pagbutngan ti Department of Justice ken ni dati a Presidente Gloria Macapagal-Arroyo ta saanna a palubosan daytoy nga agbiahe tapno agpaagas iti sabali a pagilian?

Gapu iti amak a no agbiahe daytoy a mapan iti sabali a pagilian, saanton nga agsubli pay tapno umayna sanguen dagiti charges a plunder, electoral fraud ken dadduma pay a naidatag maikontra kenkuana iti DOJ?

Ngem no patien ni DOJ Secretary Leila de Lima, maysa a flight risk ni Cong. Arroyo.

Impalgak pay ti sekretaria ti nasagangna nga impormasion a posible nga agpakni a dumawat iti asylum ti dati a presidente iti Dominican Republic, maysa a pagilian iti Caribbean. Aglalo ket saan a makapnek ti rason ni Cong. Arroyo iti panagbiahena  a rummuar iti pagilian: tapno agbirok iti doktor a mangngagas kenkuana.

Iti sabali a bangir, iti baet nga ipetpetteng ti administrasion Aquino nga awan ti pannakaibiangna iti daytoy a posision ti Department of Justice, saan a maikkat ti suspetsa nga adda iti likudan daytoy a pammilin ti DOJ secretary.

Pinakaro pay ni Pres. Aquino ti situasion idi imbagana a nakasagana ti gobierno a mangayab iti doktor nga umay ditoy pagilian a mangngagas ken ni Arroyo ket ibaklay ti gobierno ti mabusbos para iti serbisio ti doktor. Ngem saan nga inawat daytoy ti kampo ni Cong. Arroyo.

Ngem ti dakkel a saludsod: addaan kadi ti Secretario ti Hustisia iti bileg a manglapped iti ipapanaw ti maysa a tao ditoy pagilian, kas iti dati a presidente babaen ti panangilugarna daytoy iti watchlist iti imigrasion? Saan kadi a ti laeng korte ti nakaitedan ti bileg a mangiyisio iti hold departure order? Nalawag ketdi daytoy a panaglabsing iti kalintegan ti maysa nga umili nga agbiahe.

Kasapulan ngarud nga iyetnag a dagus ti Korte Suprema ti desisionna mainaig iti daytoy a banag. Ken saan koma nga agwaliwali iti daytoy a panagdesisionna a kas napaliiw kadagiti napalabas a desisionna.

Iti bukodmi a biang, palubosan koman ti gobierno ni Cong. Arroyo a mapan agpaagas iti sabali a pagilian ngem pagkarienna nga agsubli iti pagilian tapno sanguenna dagiti kasona a naidatag iti DOJ. No dina tungpalen daytoy ket agpakni iti sabali a pagilian sa dumawat iti asylum, pammatalged daytoy a dina ammo a takderan ti karina.

Ti rigatna, saan a mapunas iti lagip ti panagkarina idi a saanton nga agtaray a para presidente iti 2004 ngem eppes a balikas nga inyawyaw ti angin, gapuna a napukawna ti panagtalek dagiti tattao kenkuana.#