EDITORIAL: Panagdur-as ti itden ti ISSEZFA

Suportaranmi ti singasing a panagbalin nga Ilocos Sur Special Economic Zone and Freeport Authority (ISSEZFA) ti lugar a sakupen ti Salomague Cove manipud kadagiti ili ti San Juan ken Cabugao. Segun iti report, inaprobaranen ti House Committee on Economic Affairs ken Trade and Industry daytoy a singasing itay nabiit. Saan laeng a komersio ti idur-asna no di pay turismo ken adu a trabaho.

Ti Salomague Cove ti nakaipasdekan ti Salomague Port a nabayagen a daungan dagiti Japanese ken Chinese traders uray idi pre-colonial period. Dagiti Amerikano nga engineers ti nangpasayaat iti puerto idi 1920. Ditoy pay ti nagrubuatan dagiti barko a nangilugan kadagiti sakada a napan nagtrabaho iti kaunasan sadiay HawaiiĀ  idi 1946. Idi 1965, impaulog ni Pres. Ferdinand MarcosĀ  ti Republic Act 4559 nga agbalin ti Salomague Port a provisional status kas international port of entry ngem nasurokĀ  met a tallo dekada a naturog.Ā  Idi laeng 1997 a riniing ni Pres. Fidel Ramos babaen ti panangideklarana a permanent port of entry babaen ti Memorandum Order No. 436 a napetsaan iti June 14, 1997.

Ngem ti saan a nalawag a pasamak idi 1998, impaupa ti Philippine Ports Authority ti puerto iti pribado a port operator, ti North Quadrangle Container Service Incorporated iti duapulo ket lima a tawen. Dagiti cargo ships manipud iti Hongkong, Taiwan, China ken dadduma pay a nasion iti Asia ti dumaong iti maminsan wenno mamindua iti uneg ti makalawas. Adda pay siam a tawen a panagopereyt ti nasao a container service iti nasao a puerto.

Kunaenmi pay ketdin a long overdue daytoy a panggep. Babaen ti singasing nga ISSEZFA, nadardaras a sumanikar ti ingpen a panagdur-as. Daytoy ti mangitag-ay iti naluklukay nga isasangbay iti probinsia ti Ilocos Sur,Ā  nga agdepdepende laeng iti land transportation.

Matignay la ketdi pay a pumarasapas ken ma-upgrade met dagiti nakatunganga a puerto, kas ti Narvacan sub-port a kunam la no maganasan iti panagbuybuyana kadagiti agraragsak iti kiteboarding, iti rappelling ken zipline iti Bantay Abot; ti seasonal fishing port iti San Esteban a pagdaungan dagiti sumagmamano fishing vessels manipud iti Cagayan ken Batanes.

Saan laeng nga ad-adu a trabaho ken naganaygay a revenues ti maipaay ti ISSEZFA no di ket mairamanĀ  pay a dumur-as ti turismo, ta maitutop la unay a sangbayan dagiti nagduduma a sail boaters, yachters ken cruisers ti Salomague Cove. (JMA, Jr.)