Footer

EDITORIAL: Panagkaykaysa Para iti Natan-ok a Panggep

Ice bucket challenge, kunada. Inrusat daytoy ti ALS Association a maysa a wagas a pangawis iti imatang dagiti tattao maipanggep iti Amyotrophic Lateral Sclerosis (ALS) nga ad-adda nga am-ammo a Lou Gehrig’s disease. Maysa a neurodegenerative disease ti ALS a mangapektar iti nerve cells iti utek ken spinal cord nga agtungpal iti total a pannakaparalitiko ti agsakit iti daytoy. Mapattapatta nga aganay 30,000 nga Amerikano ti agsakit iti ALS.

Kas inrusat ti ALS Association, naawis dagiti tattao a mangaramid iti bukodda a video bayat a buyatanda ti bagida iti ice water manipud iti bucket sada iposte iti Facebook, Instagram wenno dadduma pay a social media sites. Kaapiring daytoy ti pananginaganda kadagiti gagayyem wenno am-ammoda nga agbuyat iti nayeluan a danum iti las-ud ti 24 nga oras wenno agidonar iti $100.

Kasla uram a nagramaram daytoy a panagkikinnarit para iti maysa a natan-ok a panggep. Adu a celebrity ti saan laeng a nagpabuyat iti nayeluan a danum, nagidonarda payen iti kuarta para iti ALS. Agingga idi Septiembre 6, 2014, impablaak ti ALS Association a nakaullomdan iti agdagup iti $109.8 million a donasion.

Ditoy probinsia, nagpabuyat ni Gov. Ryan Singson iti sangatimba a nayeluan a danum idi Septiembre 5 kalpasan ti panangawatna iti ice bucket challenge ti amana, ni dati a Gobernador Luis “Chavit” Singson. Sakbay daytoy, adda nangkarit ken ni dati a Gov. Chavit nga agpabuyat iti sangatimba a nayeluan a danum.

Kalpasan ti panagdigos ni Gov. Ryan Singson iti nayeluan a danum, kinaritna met nga agpabuyat iti ice water dagiti kameng ti Sangguniang Panlalawigan iti panangidaulo ni Vice Governor Deogracias Victor Savellano, dagiti department heads ti gobierno probinsial, ken agtuturay ti Vigan City government nga idauluan da Mayor Eva Marie S. Medina ken Vice Mayor Lourdes Baquiran.

Kas suportana iti ALS, kinuna ni Gov. Singson a mangidonar iti P100,000.00 para iti ALS.

Ket itay Septiembre 8, inawat dagiti opisial ti Vigan ti ice bucket challenge ni Gov. Singson babaen ti panagpabuyatda iti ice water iti mismo a Vigan Heritage Village a pakasarakan kadagiti duog a balay a napatakder pay idi tiempo dagiti Kastila kas promosion iti kampania ti Vigan City a maibilang a maysa iti New7Wonders Cities oif the World.

Kas kuna ni Mayor Medina, maysa a “humbling experience” ti agpabuyat iti ingget lamiis a danum nga ammom a makatulongka kadagiti agkasapulan.”
Ngem inkeddeng dagiti opisial ti Vigan nga ipaay iti Stimulation Therapeutic Activity Center (STAC) a pakaipakpakatan ti therapy kadagiti ubbing nga addaan iti rangkap iti bagi ti naur-orda a P20,000.00.

Dayawenmi daytoy a desision da Mayor Medina. Adun ti naullom a kontribusion ti ALS ket ad-adda a kasapulan dagiti ubbing nga addaan rangkap ti pondo ti naur-orda a pondo.

Dagiti kaskastoy a programa wenno panggep ti kapintasan a suportaran dagiti agtuturay ditoy pagilian.#