Footer

EDITORIAL: Panaglukat ti School Year 2017-2018

MAPASPASUNGADANEN ti panaglukat ti School Year 2017 – 2018 iti Pilipinas. Nakasagana ngatan dagiti eskuela, mangisursuro, estudiante ken nagannak?

Inyetnagen ni Department of Education Secretary Leonor Briones nga inton Hunio 5, 2017 ti general opening ti klase kadagiti pagadalan a sakup ti DepEd. Ngem awan ti naituding a maymaysa nga aldaw a panangrugi ti klase kadagiti kolehio ken unibersidad a sakup ti Commission on Higher Education.

Iti daytoy a panaglukat ti klase ket naan-anayen ti pannakaimplementar ti Kindergarten + Grade 12 Program ta itay naglabas nga School Year ket nagpatingga pay laeng iti Grade 11. Iti iseserrek dagiti estudiante iti Grade 12 ket agkasapulan la ketdi dagiti kanayonan a class rooms, school facilities ken textbooks nga aramaten dagiti agadal. Kasapulan pay dagiti kanayonan a mangisursuro nangruna kadagiti addaan iti specialization kadagiti nagduduma a benneg iti edukasion para kadagiti tracks a pilien dagiti estudiante iti Senior High School.

Ita a panangrugi ti school year, manamnama ti panagkirang kadagiti kasapulan a mangisursuro, pasilidad ken alikamen dagiti estudiante iti Grade School gapu iti implementasion ti K + 12 Program. Mapaliiw daytoy kadagiti pangpubliko a pagadalan ken uray kadagiti babassit a pribado nga eskuela. Agtultuloy ti pannakaikamakam dagiti pasdek ken pasilidad para ti panaglukat ti klase. Dayta ket ipakitana ti kinakurang ti panagsagana ti gobierno ken dagiti mangimaton kadagiti pribado a pagadalan uray pay nabayagen a naplano ken nayusuat ti K + 12 program.

Kas kadagiti naglabas a tawen, manamnama ti panaglilinnetlet dagiti adu nga estudiante kadagiti public schools nangruna kadagiti siudad ken dadakkel nga ili gapu ta umad-adu dagiti agenrol ken umakar nga aggapu kadagiti pribado nga eskuela gapu iti rumigrigat a biag dagiti pamilia. Agsursurok la ketdi manen ngem iti tumutop a bilang dagiti estudiante nga agklase kadagiti classrooms. Sabali pay dagiti agklase iti uneg dagiti covered court wenno iti salinong dagiti tolda, garahe wenno sirok dagiti kayo.

Gapu iti kaadu ti bilang dagiti estudiante, mapilitan dagiti school administrators a bingayen ti batang wenno shift dagiti agad-adal a mangpadagsen ti trabaho dagiti mangisursuro. Narigat man ti trabaho dagiti mangisursuro kadagiti public schools, ngem nangatngato nga amang dagiti sueldo ken benepisioda no maidilig kadagiti kaaduan a mangisursuro kadagiti pribado nga eskuela. Nagbalinen a sulisog ti nangatngato a sueldo kadagiti public schools kadagiti mangisursuro kadagiti pribado a pagadalan tapno umakarda a mangisuro kadagiti eskuela ti gobierno a maysa kadagiti nadagsen a problema ti management dagiti private schools ta awanen ti agpaut a kameng ti faculty.

Napateg unay ti edukasion kadagiti nagannak a Pilipino nangruna kadagiti Ilokano. Daytoy ti gapu a nangato ti literacy rate iti Pilipinas no maidilig kadagiti dadduma a third world countries wenno dagiti napanglaw a pagilian.

Ibilang dagiti adda mabalinna a nagannak a kangrunaan nga investment ti pannakaadal dagiti annakda. Ikagumaanda a pagadalen dagiti annakda kadagiti eskuela a nangato ti standard-na tapno masagutanda ida iti nangato ti kalidadna nga edukasion para iti naraniag a masakbayan.

Uray dagiti kadawyan ken napanglaw a nagannak ket aramidenda amin a kabaelanda tapno maisakadda ti panagadal dagiti annakda kas panangisaganada iti nasayaat a masakbayanda. Ibilangda ti edukasion a kangrunaan a maisagut ken maipatawidda kadagiti annakda a saanto a pulos a mapukaw kabayatan ti panagbiagda iti rabaw ti daga.

Dayta ti gapu a naganus pay ti nakem dagiti ubbing, ngem imulmulan dagiti adu a nagannak kadagiti panunot dagiti annakda ti kinapateg ti edukasion.  Kabinnulig dagiti nagannak dagiti mangisursuro a mangtubay ken mangted iti adal kadagiti ubbing agingga iti dumakkel ken agturposda. Ti pannakaipasagepsep ti kinapateg ti edukasion kadagiti ubbing ti gapu nga adu dagiti estudiante a Pilipino ti agkalikagum a makaturpos iti panagbasada agingga iti kolehio.

Tapno ad-adda pay mapadur-as ti kalidad ti edukasion iti Pilipinas, naikkan ti DepEd ti P543.2 billion annual budget, kadakkelan a bingay iti 2017 National General Appropriations Act nga agdagup iti P3.35 trillion. Dayta a pondo ket mausar a pangpondo dagiti mangisursuro ken agserserbi iti DepEd, pannakapadur-as dagiti kangrunaan a pasilidad, paggatang kadagiti instructional materials, ken panangipaay ti financial assistance kadagiti estudiante.

Dimmakkel met ti pondo ti CHED iti P8.3 billion, nga akinsakup kadagiti state colleges and universities ita nga school year. No nasayaat ti pannakausar dagiti pondo ti DepEd ken CHED ket awanen ti rason a saan nga agdur-as ti kalidad ti edukasion iti pagilian. Ngem kasano a bantayan dagiti umili nga agbaybayad iti buis no dagita a pondo ket maaramatda iti nakaisangratanda, wenno magastos laeng kadagiti awan-mamaayna wenno ibulsa laeng dagiti sumagmamano nga agpapaay iti gobierno? (Eden A. Alviar)